Job 9 - BUKO SIPUNENAN

Job

¹ Tapoi aleginangannia si Job,

² “Bulatnia, akuagaian, kirenangan kisedda, kipa ioi ramaroipo sirimanua ka matat Taikamanua?

³ Ka sangaribu parerekat siaket Taikamanua, berisara momoi raaleginia sirimanua.

⁴ Taikamanua masiku patuat samba maron kasei momoi itakaiNia.

⁵ Nia te amasigalakngake leleu ka kudduat bagei sitaiagaijetda sirimanua, lepa bailuakenangannia kabagat goluNia sabeu,

⁶ singeungeuake polak ka kudduatnia, pat paguilaknangan ariginia.

⁷ Taikamanua momoi ikeraake ibela sulu kateteret simansep, samba ikekreake iputoro panyanyat sinoibo.

⁸ Nga'ngaakenangan manua sarania, paperakinangan teitei ulou koat sabeu.

⁹ Kaunangan panyanyat kaiaman silakkup polak, kisedda leu et panyanyat Biduk, panyanyat Belantik samba panyanyat Kartika.

¹⁰ Tamomoi taagai kolou sangamberi sigalaiNia, ta momoi taadde sangamberi pukerenganNia.

¹¹ Tusabaunangan ka matakku, tapoi ta akuitconia, tusabaunangan ka bebeku, tapoi ta akuagai.

¹² Ke masiraurauNia, kasei momoi masikeraakeNia ele parere' katubuNia, “Ale, apa Nugagalai?”

¹³ Ta ikekeraake Taikamanua golu samba oloi patuatNia, sapagugulet Rahab leu murekkuk katubuNia.

¹⁴ Oto, kipa iooi kutakaiNia? Aponia tiboiet kukakau kualegiNia?

¹⁵ Kenanen sineseat le aku, ta leu et momoi kutakainiaNia, tapoi kutiddou le katet bagat Taikamanua sipasiukumku.

¹⁶ Ke musoga aku, aleginanganNia, ta momoi kukatonemi, obana masiarepi ngangangku,

¹⁷ Pabubunangan aku kabagat rusa talabari, samba tuppainangan pangoringanku sita' paluluat.

¹⁸ Ta iobaake kupuenga goiso, tapoi iorakngake katubukku puponginan simakope.

¹⁹ Ke pagalaiat ron tubu, Nia le sibakkatNia! Ke pagalaiat puroipoat, kasei momoi masiasoliNia.

²⁰ Kenanen sineseat le aku, ngungungku masipopoiliat puseleatku, kenanen ta masele aku, poiliatnanganNia puseselekku.

²¹ Ta masele aku, tapoi ta kupuletcei tubukku, ta kupuletsei purimanuaiatku,

²² simasele samba sineseat, makere le enungan purimanuaiatda, ka ruania isusubuake le Taikamanua.

²³ Ke matei sinulut sirimanua sitaimasele muga'ga le Taikamanua.

²⁴ Polak ikau Taikamanua ka kabeira sirimanua sikatai, samba tai sipasiukum igalai ramapeset sangamberitda. Taikamanua masigalai sangamberinia nene, ke ta Nia, kaseian le?

²⁵ Gogoiku bulat maruei itusabau, lepa mapepenangan sita' pusanangan.

²⁶ Kele ituitui abak, rueinia itusabau purimanuaiatku, kele manyang ituluttut, ilalau ibania.

²⁷ Ke koba muga'ga ka angkat baga, ke kusibo masikalipogi sangamberi pangoringanku,

²⁸ iageti oi minca reureu bagakku, masikukru aku, kalulut kuagai, Taikamanua mariuriu le iseleake aku.

²⁹ Oto, ke kisedda, apangan le lulunia kuorei tubukku siboboi?

³⁰ Ta anai sabun sioi masitata'ake jokku!

³¹ Taikamanua masilelepmake aku ka simalolit pat masitsitnangan leppeiku katubukku.

³² Ke sirimanua bai Taikamanua, momoi kualegiNia, lepa ei kai ka pakaroat masilepaake sangamberi paukelat.

³³ Tapoi ta anai ka talagamai sipasikeli pakaraoatmai sioi masipakaroake kai ruamai.

³⁴ Bule Taikamanua muari masiukum aku samba iareuake bobo'boNia katubukku!

³⁵ Ta maloto aku katubuNia samba maninibongan le aku kineiget, kalulut kuagai pupaatuananku.