Job 8 - BUKO SIPUNENAN

Bildad

¹ Lepa kuanangannia si Bildad,

² “Pigamoian le burunia nupanibo kisedda, tiboietnu kele rusa sipurorou.

³ Aipakatai pa puroipoat Taikamanua? Aipakatai pa pubulanan Sipulugege?

⁴ Ke aragalaian jo tatogam katubuNia, oto mateu le Iukumake sia.

⁵ Tapoi ke nugaba Taikamanua, samba nutiddou pununtuat baga sibara ka Taikamanua

⁶ ke malina patuatnu, ropmakenangan ekeu Taikamanua, samba paerunangan leu pulalalepnu.

⁷ Pukayoatnu simapepepe nenda ta anai lulunia ke tukireki apa siloketnu geti.

⁸ Parereake pagalaiat sia sirimanua siburu, samba lelekngake aponia gabaetda taikebbukat.

⁹ Purimanuaiatta matete' le, ta taagai apapa, kalulut gogoita kele ailiggou ka polak.

¹⁰ Arepmake tiboietda sirimanua simatopit siburu, araakean gelaiet nene katubum,

¹¹ ‘Momoi pa iputu'tu sarei simananta, ke ta ka onaja, ele imaeru iputu'tu labbaet ke ta ka oinan?

¹² Ainia mututu'tu, ta'pei teterenia tugetai malajunangan boiki bele pei rueinia ilaju se'se bagei.

¹³ Kisedda te purimanuaiatda sangamberi sirimanua sikalipogi Taikamanua, mapepenangan leu karonietda sirimanua sikatai,

¹⁴ karoakenenda kele jarik tailakkak, katonemienda kele jarik taikakkak.

¹⁵ Maron pa jarik nenda ke tubailiuakenia addaiet? Maron pa banang nenda ke tubailiuakenia ukkaakenen?’

¹⁶ Kele turu-turu simeru le nia ka oloi sulu, pulalaknangan ka sangaliot mone.

¹⁷ Ungatnia ipabolini pabukku-bukku ka polak ipabolit simaron, ta malabbei ipauilaknia.

¹⁸ Tapoi, ke tuburaunia ka kudduatnia, taiagainangan leunia kudduatnia nenda.

¹⁹ Kisedda te pusanangan purimanuaiatnia, samba pututunangan leu turuturu bagei sibara ka polak.

²⁰ Tapoi Taikamanua ta ikakaddiuake sirimanua simariuriu topit, samba leu ta iroropmake sirimanua sikatai.

²¹ Igagalai te ngungum muga'ga, samba bibom mugora baga.

²² Mailarangan leu sipulagaki ekeu baga, samba ta'an babara minca lalepda sirimanua sikatai.”