Job 7 - BUKO SIPUNENAN

¹ Ta pa mugagalai sirimanua ka polak, samba purimanuaiatnia kele purimanuaiat sirimaua siupaiji?

² Kele pagugulet sikiddi pukuneman, kele sipugagalai siupaiji singena upania,

³ sanganantat laggo purimanuaiatku ta'anai ailiakenen, sanganantat soibo patuatku sun le reureu baga.

⁴ Ke mei aku merep, maburu soibonia, kukiddi pato, ta masanang peperepku,

⁵ Tubukku sun le leiti samba balak logau, lubbenangan kulitku samba ibelaake suania.

⁶ Purimanuaiatku sita' anai karonan nenda riuriu ituitui ka kalepakatnia, bulat maola bele pei sipanunuilak ienungake kudduat banangnia.

⁷ Repdep le, ale Taikamanua, purimanuaiatku enga siulupmakenen le, pusananganku tata', ta anai amulegei.

⁸ Kineneiget Nuinco aku, tapoi nenda ta maburu. Ke Nugaba aku, ta'an anai aku.

⁹ Kele tinobut situtuitui, lepa mapepenangan, sirimanua leu et matei, ta'an totoili minca.

¹⁰ Sangamberi sirimanua siagainia, kalipogirangannia samba ta'an rarerepdepnia.

¹¹ Kalulut nenda ta momoi kuputangeu! Tamomoi kukoiri reureu baga samba pangoringanku. Buita' kubuka le ngungungku, samba kubelaake sibara ka patuatku.

¹² Angoi mariuriu Nupaitcoake samba Nujago aku? Ulou koat sabeu kalotoakenen pa aku?

¹³ Perep aku samba kusibo masiaroi tubu, kugaba sinangkaake pusaggoat patuatku.

¹⁴ Tapoi lotonungan aku ka pangamutet, Baraakenungan pangamutet sikatai samba pupaatuat.

¹⁵ Bailiu kuoba peile tupetcut lolokkat, lepa matei ka purimanuaiatku simasun pangoringan nene.

¹⁶ Masaggongan samba mangauan aku murimanua, kuoba le matei! Obaakean aku, kalulut ta anai paluluatnia purimanuaiatku.

¹⁷ Angoi makope Nuabeuake sirimanua? Angoi mariuriu Nulelekngake sigalainia?

¹⁸ Nupaitcoakenia senen simansep, samba senen tetere Nusibonia.

¹⁹ Pigamoian le Nupisikngake aku, pat gukkungan menmenku?

²⁰ Ale sijago aku, marugi pa Ekeu kalulut jokku? Angoi nubailiuake aku panaenNu? Bulat mabesi' pa Nupasikeli aku?

²¹ Ta' pa momoi nuappeake jokku? Ele ta momoi pa nutataake puseleatku? Ta'an mauju kuperep kabagat ratei, samba ke Nugaba aku, ta Nusesese aku.”