Job 6 - BUKO SIPUNENAN

Belet bagat Job ka sasuruaknia

¹ Lepa aleginangannia si Job,

² “Ke tukilo bai sanenia reureu bagakku,

³ bulat bele peile sanet ngai ka koat. Oto, bui' makisei ka bagamui ke tiboietku ta sipinagaba samba leu siolaakenen.

⁴ Silogui sibara ka Sipulugege masipunu tubukku, tusalunangan omainia ka sangaliot tubukku. Pubebeunan Taikamanua bulat kalotoakenen, samba isaggangi aku kele saladdut saggak.

⁵ Kalidei masege baga mukom ke tukau se'se sibau, kisedda leu et jaui ke tukau kannia.

⁶ Tapoi komen simaleu, kasei siobania? Kipa ibabara nanam bagat attelu simabulau?

⁷ Ta koba irapenia, ingau le aku ikomnia.

⁸ Angoi ta ioba Taikamanua masiarepi panindogatku? Angoi ta ipuletcei sogakku?

⁹ Bule ioba Taikamanua ibubuake aku! Bule igalaiake samba itata'ake engangku!

¹⁰ Nenda te sibailiu pusuibiat kaku, puturu'kungan geti ka talagat pangoringan. Sangamberi tiboiet Taikamanua Sipululatcat, Akureddetnan samba mariuriu kupasikelinia.

¹¹ Aponia ronku, bailiu aipeile aku? Aponia karoakenenku kuoba imaburu kupurimanua?

¹² Kele ron bukku pa tubukku nene? Sibara ka tembaga pa tubukku nene?

¹³ Tata' le ron tubukku masigaba paroman, ta'an anai kaku paroman.

¹⁴ Ka bagat pangoringan kele nene, kukiddi suruak sipulelek. Ele mariuriu peile topitku ele ta'an akupuletcei Sipulugege.

¹⁵ Tapoi kam, ale saalei, tamomoi tukatonemi samba tukaroake. Kam kele bagat oinan simagarak, kateteret ta ibara urat.

¹⁶ Kam kele bagat oinan simaineng samba sitaipuguguruk, kalulut aitabbonia oinan simapaggla.

¹⁷ Ke moi simaruei tetere simaoloi, salju samba oinan simapaggla nenda tata' berisara. Bagat oinan bailiu magarak, ta anai oinan samba simakopet garak.

¹⁸ Mapeperangan sipusisila kateteret ragaba oinan pueppakrangan samba matei sia ka polak simalio simatangeu.

¹⁹ Sipusisila sibara ka Syeba samba sibara ka Tema masigaba samba masikaroni oinan nenda.

²⁰ Tapoi siboboi le besiakenenda ka bebet bagat oinan sita' anai oinannia.

²¹ Kele bagat oinan nenda te kam, saaleiku, soksokmuiannia samba muloto masiitco pangoringanku.

²² Angoi? Akutiddou pa apapa katubumui? Ele akukoiniake pa kam masibulagani sirimanua sibailiu uktukku?

²³ Akutiddou pa tuarauake aku samba tutebui aku ka saggak sikatai?

²⁴ Oto, gelaiake kam aku, patoila kam puseleatku! Aile kutangeu tubukku samba masiarep tiboietmui.

²⁵ Tiboiet sipulelek sironake paatuat, tapoi tiboietmui siboboi, sita' katukolobat!

²⁶ Sangamberi tiboietku nukakau le kam kele rusa, siboboi le alegiatmui kaku sipubebela baga.

²⁷ Beringan sipululusai nupauktukngake kam enungan purimanuaiatdra, saaleimui sipulelelek nupabokoiji kam bule numakayo kam.

²⁸ Sibo pei, nulelekngake kam aku, pabobokoi pa aku katubumui?

²⁹ Bui' nugalaiake kam sitaimaroipo, agai kam! Bui' nuseleake kam aku, bulatnia ta masele aku.

³⁰ Nukua pa kam pabokoatku le, ta momoi kupabaggei simaeru samba sita' sele?