Job 5 - BUKO SIPUNENAN

¹ Pusoga le, ale Job, ai leu pa alegiatnia? Katubut Malaika kasei anutiddou paroman?

² Sarat sirimanua sitaiagai patuat le simamatei kalulut besit patuatnia.

³ Akuitco sirimanua sitaiagai patuat, bulat matoila ron purimanuaiatnia. Tapoi sinulut pateleijikungan kudduatnia.

⁴ Iageti ta'anai siropmake tatogania, ta'anai sioba masiropmake sia ka pakaroat.

⁵ Aponia tugetai ka monenia, komrangannia itata sirimanua simalaje. Beringan gandum ka bakkat parou sappru rakomnia simalaje. Pukayoat sibabara katubutda ibailiu taikoetda sirimanua simaoro mata ka pukayoat.

⁶ Ta ka polak aibara pukakatai, ta ka polak aibara pangoringan,

⁷ tapoi sirimanua le aibaraake pangoringan katubunia, kele itubetti bot obengan ka pata.

⁸ Ke aku bai ka purimanuaiatnu, ka Taikamanua le kupusosoga. KatubuNia le kupangangasege, samba leu kukakau pakaroatku.

⁹ Bulat abeu sigalai Taikamanua, tamomo ikeruijinia patuatta. Sangamberi kiseiet sigalaiNia tamomoi tuadde samba ta'anai katatakatnia.

¹⁰ Beleakenangan urat ka polak, bailiu mone samba polak simalio masuanangan isubuinia.

¹¹ Nia te Taikamanua sibuakngake sirimanua sitaiaddeakenen, samba siangkaake bagatda sirimanua sipangongorik.

¹² Tairiuriuakenangan pinatutda sirimanua simapatajuet

¹³ paseseakenangan samba labanangan sia siagai patuat, bailiu taipuriuriunangan sangamberi galaiakenenda, samba bokoinangan sia paatuatda.

¹⁴ Ka sinago oraknangan sia gepgep, pasilulurangan kele teteret sinoibo.

¹⁵ Tapoi Taikamanua masiarauake sirimanua simageba sirimanua sitaiaddeakenen sibara ka paoreijat.

¹⁶ Kineneiget aian karonan ka sirimanua sita'anai apapa. Samba sirimanua sikatai ta anai berisara abela tiboietda, kalulut aipetpetnakean ngungunda Taikamanua.

¹⁷ Mauktuk ekeu ke igolu ekeu Taikamanua! Bui' mabele bagam ke iseleake ekeu.

¹⁸ Kalulut Taikamanua masibesiki Nia leu et masilalaggek. Samba kabeiNia masipaboboki, Nia leu et masialeake minca.

¹⁹ Ke moi kalotoakenen masiloto, mariuriu le iarauake ekeu.

²⁰ Ke bara pulajeat sabeu, ta'an mamatei ekeu kalalulut laje. Ke bara pasaggangan sabeu, bela le ekeu ka kamateiat.

²¹ Ijago ekeu ka paloloiat samba patubbuiat, mattainungan gejat baga ta'anai loto.

²² Katusubuat samba pulajeat gagatinungannia samba tarimeu simasabbak ta nukalotoake.

²³ Mone pakkuretnu ta mabubukku, tarimeu simasabbak ta isasaggangi ekeu.

²⁴ Maaraunungan mukuddu ka sapounu, samba ke nulelekngake sangamberi biribirim, ta'anai simapepepe.

²⁵ Sapunuteteunu tamomoi tuadde, igitda kele se'se ka polak simalio.

²⁶ Kele gandum simarak, tugetai ka gogoi pasigetaiat, purimanuanungan leu et ka aroi tubu teret baja'.

²⁷ Job, sangamberinia nenda akulelekngakean kai. Tiboiet nenda sineseat te, oto silo' le.”