Job 42 - BUKO SIPUNENAN

Job

¹ Oto alegiat Job kai Tuhan:

² “Kuagai, momoi Nugalai sangamberinia, samba ta'anai ta'amuriuriu sipinatum.

³ Kuanungannia, “Kasei nia amasilipputnake siteuakenen sita' anai siagai? Iate lulunia, tatat agai kolou kupumumuanake pagalaiat kiseiet kaku samba sitaiagaietku.

⁴ Arepake, maninibo Aku katubum, Kurerere' te ekeu, bule nupaagainia kaku.

⁵ Sarat sibara ka tiboiet sirimanua le kuaarep pagalaiat Ekeu, tapoi kineneiget matakku masimattai Ekeu.

⁶ Kalulut nenda kutiktik minca tiboietku samba kabagat olei baga kuddu aku ka pasiribbaijat samba ka sese.”

Tupaeru minca purimanuaiat Job

⁷ Lepat aikua kunennia si Tuhan kai Job, kuanangan si Tuhan kai Elifas, “Magolu Aku katubum samba ka ruatdra aleinu, kalulut ta anukua kam simakolou pagalaiat Aku kele paguguletKu si Job.

⁸ Kalulut nenda, ala pitu ngamuneng lembu simanteu samba pitu ngamuneng biribiri simanteu samba ei ekeu ka paguguletKu si Job. Lepa panguruatakenungan sangamberinia nenda sibailiu buluakenen rarangen addeatmui, kalulut sarat panindogatnia le Kusisilo, bule ta Kugalaiake paoreijat katubumui, kalulut ta anukua kam simakolou pagalaiat Aku kele paguguletKu si Job.”

⁹ Iageti ei si Elifas, tai T'eman, Bildad tai Suah samba si Zofar, tai Naama, lepa galaiakerangan kele sikuat Tuhan katubutda. Samba si Tuhan masisilo panindogat Job.

¹⁰ Lepa paerunangan purimanuaiat Job si Tuhan, kalepat aipanindogi sasuruaknia, samba si Tuhan masikau kai Job rua kali lipat sangamberi sibabara katubunia kateteret siburu.

¹¹ Iageti oi sia sangamberi sasarainania taimanteu samba tainanalep samba sangamberi saaleinia siburu, samba pukomrangan simakere ka lalepnia. Segeakerangan reureu bagatda samba pusuibirangannia kalulut sangamberi pangoringan sikau Tuhan katubunia, samba senenda masikau piga pa; bulagat samba sara sipsip mas.

¹² Tuhan masipanukani si Job kabagat purimanuaiatnia samba bele peile kapurimanuaiatnia siboiki. Biribirinia pulu epat ngaribu ngamuneng, unta enem ngaribu ngamuneng, jaui rua ngaribu ngamuneng, samba kalidei sangaribu ngamuneng.

¹³ Bara tatogania pitu taimanteu samba telu tainanalep.

¹⁴ Togania sinanalep siboiki kaunangan oninia Jemima, sikarua Kezia, samba sisule' Kerenhapukh.

¹⁵ Ka sangalio laggai ta'anai taiokko kele laingen tubutdra tatogat Job. Ka sia tukau leu rubeiat ikepakenen ukkuira, makere le kele ka sabaliura.

¹⁶ Lepa nenda aipeile muririmanua si Job sangotu epat pulu ngarura burunia, bailiu aiitco peile sateteunia pat aili reddenan sikaepat.

¹⁷ Iageti matei si Job kabagat baja simakope.