Job 41 - BUKO SIPUNENAN

¹ Momoi pa nuala sikoinan Lewiatan, nukau kakabli pasikablit iba? Momoi pa nusakkut jalainia nukau tali pasiappra?

² Momoi pa nukau tali ka asaknia ele panangkut laba ka bakklania?

³ Ititiddou pa katubum bule nubelaakenia? ele patibo kam, itiddou katet baga?

⁴ Igagalai pa pakerekat baga katubum, samba mupalelek ipasikeli ekeu simariuriu?

⁵ Nuaappra pa nia kele uma pasikeliet, siangkaake bagat sapagugulet tainanalep?

⁶ Tupasasaki pa nia ka sipuiiba samba tuparubei ka talagatda sipasasaki?

⁷ Momoi pa nupunu kulitnia nukau sosoat sitelu sot ele nupabaijunginia patara sipukpukake utenia?

⁸ Bekbek le nia sangaminca, samba ta'an nuoleake minca; palabakat nenda ta nukakalipogi teret buruburu.

⁹ Senen sirimanua siitco Lewiatan, masuleinangan tubutda samba kalapuinangan sia.

¹⁰ Magegenia ke tusuruakenia ka peperepnia, ta'anai berisara sirimanua simagege murio ka matania.

¹¹ Kasei momoi masilabania sita'anai siorangan katubutda? Ka polak nene ta'anai sioi masilabania.

¹² Konan le Kupumumuanake pagalaiat putubuat Lewiatan, pagalaiat puroronnia samba putubuatnia simalainge.

¹³ Ta'anai berisara sirimanua sioi masibiritake leppeinia ka uddut ele masipukpukake leppei pasaggak sipakeinia.

¹⁴ Kasei momoi masibuka ngungunia simaron, sibara sot simaron?

¹⁵ Kele korobbi sipagalak simakolou, iate teiteinia tuettet sipatatabbra, kele kelat bukku.

¹⁶ Sipasasaksak, tuappra simaron, pat taioinangan ituguru' rusa.

¹⁷ Korabbi nenda bulat maron sipatutut pat taioinangan tupasaraake.

¹⁸ Ke mupaisi Lewiatan, pubettinangan toro, matania makirisau kele ibela matat sulu.

¹⁹ Jalai obengan bela sibara ka ngungunia, ogot obengan mutoro ka senen kudduat.

²⁰ Bela kujuk sibara kabagat asaknia, kele kujuk loina ka tei pario.

²¹ Engania masiobekake putcu, julu obengan bela sibara ngungunia.

²² Tetekatnia bulat maron, pat malotorangan sangamberi ka matania.

²³ Ta'anai kudduat simame'me ka kulitnia, ta mararagat kalulut kele kelat baja.

²⁴ Patuatnia kele ron bukku, ta iagai puiingo maron kele bukku pasigulutat.

²⁵ Ke tusurunia, sirimanua simaron tubu leu tata' gegetda, tata' ron tubu kalulut kopet puloloto.

²⁶ Ta anai lanjau sioi sioraknia, sosoat, silogui ele patara ta momoi ibesikinia.

²⁷ Laba ikau le kele roimet se'se samba tembaga kele me'met loina simamumu'mu.

²⁸ Ta'anai silogui sioi ipaoranginia bukku siribbaiakenen katubunia kele legei siperakat le.

²⁹ Tutura ikau le kele sara buluk se'se simagarak, muga'ga le nia ke rasoatnake katubunia patara.

³⁰ Susrut balugunia kele siragatat simalauru buttet. Kele pakeiet pasipokpok ipagaigaiji loti samba ipasilania.

³¹ Pagotconangan polak pat kele igokgok oinan, kele panci paneu tula simabubut.

³² Ikaddiuake siperakatnia simatoro, silinangan koat ibailiu bubut simabulau.

³³ Ta'anai sisagganginia ka polak, sipuririmanua sitaiagai loto, nia te nenda!

³⁴ Tarimeu simakope lainge leu ikau paloloiatnia, ka talagat tarimeu simasabbak, nia le rimata.”