Job 4 - BUKO SIPUNENAN

Patiboat siboiki 4:1–14:22 Elifas

¹ Lepa panibonangan si Elifas, kuanangan,

² “Job, taleu maasa bagam ke manibo aku” ta momoi kutangeu tubukku simaburu.

³ Amaigingan anugelaiake sirimanua, samba sia simasaggo tubu nukau sia ramaron.

⁴ Tiboietnu sibaraake ron paatuat, samba masironnake sirimanua simasaggo.

⁵ Tapoi kineneiget iorak ekeu reureu baga, tugegenungan, samba bailiu belet baga.

⁶ Ta pa mariuriu topitnu ka Taikamanua, ta pa malina putopinannu? Ke kisedda, aisesengan putotonem bagam samba taimabelet bagam.

⁷ Paatu le, ai leu pa sirimanua sita' sele siorak kamateiat samba gejat baga?

⁸ Akulelekngakean, sirimanua sipamamangkru mone pukakatai, samba sikarapmake karamen pugejaat baga kele luikut ureman, silonangan kamateiat samba pugejaat baga!

⁹ Kele rusa talabari, kisedda te golut Taikamanua imateiake sia pat masuburangan!

¹⁰ Sirimanua sikatai murou sama musou, kele ipurou singa. Tapoi Taikamanua masipetpet ngungunda samba masibakbakngake sonnia.

¹¹ Matei sia kele singa sita'anai komen, bailiu masaragainangan totagania.

¹² Ai sara pamoilianan sisege katubukku, kele nganga simamoile ka talingangku.

¹³ Geugeunangan peperepku, kele ibara pangamutet sikatai katalagat sinoibo.

¹⁴ Tuge'gekungan leu samba muloto, pugeretnangan sangaliot tubukku.

¹⁵ Sara ketsat tusabau ka matakku, iageti bela sorobutku.

¹⁶ Puarinangan, tapoi ta akuagai tubunnia. Lepa arepkungan nganga sigaugauake simatangeu,

¹⁷ “Bulatnia leu pa ta'anai puseleat sirimanua ka matat Taikamanua? Bulatnia leu pa malinania ka matat Sibaraakenia?

¹⁸ Beringan sapagugulet Taikamanua ka manua, ta momoi ikatonemi sia. Beringan ka samalaikaNia sesenangan puseleat samba jo.

¹⁹ Sarapei sipuririmaua sibara ka polak sibara ka abu sioi tuneinei kele tabbubulut!

²⁰ Sia nenda murimanua kateteret simansep, lepa matei sia kasoibokat taipuukuket, samba ta'an turerepdep sia minca teret buruburu.

²¹ Oto tata' sangamberi sibabara katubunia, samba leu mateinia ta aisese pusisikut patuat.”