Job 39 - BUKO SIPUNENAN

¹ Nuagai leu pa pigamoi aiputu'tu matat inan kambing leleu? Anulelekakean leu itu'tuake matat togania simatsura simalia?

² Nuagai leu pa piga burunia ipusuruket? Momoi pa nuadde teterenia iputoga?

³ Nuagai pa pigamoi iguruiake tubunia, lepa tu'tuakenangan matatda tatogania?

⁴ Puuraurangan samba maronrangan tatogania ka bakkat loina putuituirangan samba ta'an totoili minca ka inania.

⁵ Kasei masibelaake kalidei simalia ka leleu? Kasei masibuka talinia samba masiobaakenia ipugejek?

⁶ Katubunia Kukau polak simagaktuk sibailiu lalepnia samba su'su simagaram sibaliu laggainia.

⁷ Areuakenangan tubunia ka laggai samba sirimanua simigi, ta anai sioi masiomake samba masikaunia mugalai.

⁸ Se'se simalio ka leleu kudduat komennia, gabanangan se'se siputu'tutu sibau sedda.

⁹ Ioba leu pa lembu simalia ipugalai uktuknu? Ioba leu pa ipugogoi kabagat gelim?

¹⁰ Momoi leu pe nuapprania samba nubesiake ipasikuilu uktuknu?

¹¹ Momoi leu pa nukaroake ron tubunia, samba nukau katubunia galaiakenennu simasane?

¹² Nukakatonemi pa nia masiruruake buat monem, samba nuabbitnia ka kudduat pamerakat?

¹³ Apate kopet ruei ipuleuleu kappot uma unta! Tapoi tamomoi ipakereake uma' seggu.

¹⁴ Uma' unta muattelu ka polak, lepa kaddiuakenangannia, oto ngai le masioloiake attelunia.

¹⁵ Ta irerepdep pepera'rania sirimanua samba ipaperakinia tarimeu simalia.

¹⁶ Galaiakenangan ka tatogania kele ta togania, ta ipuletsei ke siboboi le sigalainia.

¹⁷ Aku te amasikaunia sitaiagai patuat samba simakela patuat, ta Akukau katubunia sikut patuat samba puaagai.

¹⁸ Tapoi ke itaddaake mubalau kalaakenangan kuro samba simuriakenia.

¹⁹ Ale job, ekeu pa amasikau ron katubut kuro samba saggarat sipugigilok ka tetekatnia?

²⁰ Ekeu pa amasikoiakenia muattat kele sit, samba soak engania ipalotoki sirimanua?

²¹ Gaigainangan polak ka su'su kabagat angkat baga, samba kabagat ron tubu iei ka kudduat pasaggangan.

²² Ta iagai katukolobatnia geret tubu samba puloloto, ta'anai lanjau sibaraake tetet patuatnia.

²³ Pamatei siukkaakenen simuriake kuro jijining samba gepgep iorak pato.

²⁴ Ka bagat ron tubu ipubalau kuro nenda, ke munau pipiau ta momoi ikeraake tubunia.

²⁵ Punaunangan senen itunauake pipiau pingnangan kasareunan singin pasaggangan. Arepnangan gereira saladdu kateteret rakau parenta.

²⁶ Anugelaiake pa manyang tuburut ke iailiake ka kaiaman kapponia situnganganga?

²⁷ Parentam pa itutututake uma rajawali kepei igalai rumunnia ka leleu simabuak?

²⁸ Galainangan lalepnia ka uddut leleu bulak, sangamberi buttet bukku simalauru ibailiu kekrenia.

²⁹ Ainia sedda pasiitconangan ka sangamberi kudduat matania masitaiko masigaba komennia.

³⁰ Kaipa sibara simamatei, ai nia sedda, samba logau komennia nenda lo'rangannia tatogania.