Job 3 - BUKO SIPUNENAN

Ngunyut Job katubut Taikamanua

¹ Iageti taddaakenangan manibo si Job samba ipateleiji gogoi pututukat matania,

² kuanangannia,

³ “Ale Taikamanua, pateleiji gogoi pututukat matakku, samba sinoibo ka panandaat aisuruketnake aku inangku!

⁴ Ale Taikamanua, bailiuake gogoi nenda simagepgep tata'ake ka patuatNu bailiu ta'an Nurerepdep bui' leu Nuobaake pato itoroijinia.

⁵ Bailiuake le gogoi nenda simakope pusu' gepgep, maramun samba makamung, saluki le nia tinobut sakkeri le nia katorot matat sulu.

⁶ Tata'ake le soibo nenda ka pangandeat rura samba laggo, buian iturepdep, buian leu itukua.

⁷ Eddangan soibo nenda simasun pugepgeman ta anai sipususule', ta'anai puangkakat baga.

⁸ Ale kam sipukekerei samba sisuruake Lewiatan, orakngake gogoi nenda suppa samba pateleijat.

⁹ Eddangan imagepgep panyanyat kasoibokat, eddangan ipusiboboi ingenaake pato, bui' iitco ibela sulu.

¹⁰ Tutelei le soibo sikatai kateteret aitu'tuake matakku inangku, samba tuobaake isilo pangoringan.

¹¹ Angoi ta amatei aku kabagat suruket inangku, ele tata' enga kateteret putu'tukat matakku?

¹² Angoi ilakkaiake samba ikupkupmake aku inangku, itottoni aku ka tottotnia?

¹³ Ke matei bai aku kateteret nenda, aian aku memerep kabagat pusanangan,

¹⁴ kele tai rimata samba siabeu tiboi tubu ka polak, sirioake minca lalep purimataat siburu.

¹⁵ Merep aku kele tatogatda tai rimata, sisunake perak ka lalepnia.

¹⁶ Angoi ta aiputu'tu matakku sita' enga, bule imaeru samba imasanang peperepku?

¹⁷ Sedda, kabagat ratei, sirimanua sikatai ta aragalaiake sikatai, samba sipugagalai siupaiji simasaggo tubu momoi raaroiake tubutda.

¹⁸ Kisedda leu et sitangsiakenen maarauan sia, ta'an ragegeugeu sia sipujajago.

¹⁹ Sedda makere le sangamberi sirimanua simabuak tiboi tubu samba sirimanua sitaiaddeakenen samba leu sapagugulet maarau sia ka tuannia.

²⁰ Angoi tuobaake sirimanua rapurimanua simariuriu ka pangoringan? Angoi tukau toro ka sipurereureu baga?

²¹ Raoba peile ratei bele pei ka pukayoat, singena kamateiat, tapoi ta babara.

²² Ranananam geti pusanangan ke matei sia samba turateiake.

²³ Purimanuaiatda ka gogoi sibabara ilipputnake le' Taikamanua, goiliknangan sia ka sangamberi matat rusa.

²⁴ Silit komenku iate ngunyu'ku ta anai arinia kupukatci.

²⁵ Sangamberi pukaranan bagakku, oraknangan aku, sangamberi kalotoakenenku, oi katubukku.

²⁶ Ta anai pusananganku, ta anai kalepakatnia pangoringanku.”