Job 26 - BUKO SIPUNENAN

Job

¹ Tapoi aleginangannia si Job,

² “Apate eru paromanmui ka sitai maron tubu, samba paromanmui ka kabei simasaggo!

³ Apate eru nganturatmui ka sirimanua sita'anai sikut patuat, samba katukolobat sipususukkra sigelaiakenenmui!

⁴ Kasei aingantomanake ekeu masikua sangamberi tiboiet nenda, samba kasei tiboiet nupatotoila?

Bildad

⁵ Aleginangannia si Bildad, “Sangamberi sirimanua ka polak kamateiat mugeret tubu, kisedda leu et oinan samba sikukuddu ka bagania.

⁶ Laggaira taikabaga tunga'nga' ka matat Taikamanua, kudduat katusubuat leu ta'anai takkenia.

⁷ Taikamanua masinga'ngaake manua, ka uddut koat simalio, samba masitoakngake polak ka kudduat sita' kabaga.

⁸ Tabutnangan oinan kabagat tanai rusaNia, tapoi tanai rusa nenda ta'amabirit.

⁹ Patpatnakenangan matatbaliu kudduat purimataatNia, ilakkopinia tanai rusaNia.

¹⁰ Aitiktikngan gorot ka uddut oinan, pat aili ka tu'tut pasongan ka toro samba gepgep.

¹¹ Sangamberi arigit manua puuilaknangan, samba tuge'ge ka paasekatNia.

¹² Ailebakngakean koat kabagat gegeNia samba bubuakenangan si Rahab kabagat sikut patuatNia.

¹³ Kalulut engaNia manua ibailiu mapato kabeiNia masimateiake ulou simagege.

¹⁴ Bulatnia, sangamberinia nenda pangampulat enunganNia, bulat mamoile nganga siarepta sibara kai Tuhan! Kasei momoi masiagai kolou kopet beunan gegeNia?”