Job 23 - BUKO SIPUNENAN

Job

¹ Tapoi aleginangannia si Job,

² “Kineneiget pungungunyukku ibailiu taimareddetku, kabeiNia masipaoreiji aku, pat pukatcikungan.

³ Oh, bule kuagai kudduatNia, bule ioi kuei samba kupaaili katubuNia.

⁴ Iageti belaakekungan pakaroatku ka mataNia, samba ngungungku kusutnake tiboiet pasiseseake tubu.

⁵ Iageti agaikungan alegiat siakeNia katubukku samba agaikungan kolou, apa sikuaNia katubukku.

⁶ Ioba leu pa ibaraake pakaroat pasamba aku kabagat gegeNia? Ta, ipuleletcei le aku.

⁷ Sirimanua simaroipo le masineseatnake tubu ka mataNia, samba bela le geti aku sipasikeli pakaraoatku teret buruburu.

⁸ Sibulatnia, ke muenung aku ka isit kabelaiat sulu, ta'anaiNia sedda, ele ka isit kabelekat sulu, ta akuseseNia sedda,

⁹ kugabaNia ka bare', ta amakoinongNia, ka isit kaiaman, ta akuitcoNia.

¹⁰ Kalulut iagai enungan purimanuaiatku, ke isibo aku, makoinongkungan kele mas.

¹¹ Rerekku mariuriu masitut siperakatNia, tutnakekungan enunganNia samba ta'tusosoip aku.

¹² Parenta sibara ka ngunguNia ta kupasasabau, koiriakekungan tiboietNia kabagat patuatku.

¹³ Tapoi Nia ta isisili, samba kasei momoi masikekreakeNia? Aponia siobat bagaNia, galaiakenangannia.

¹⁴ Kalulut Nia masilepaake apa siteuakenen katubukku, samba maigi pei le bagei simakere nenda sipinaatuNia.

¹⁵ Iate lulunia ipugegeret tubukku masimattaiNia, ke kupaatu sangamberinia nenda, iageti malotokungan katubuNia.

¹⁶ Aigalaian Taikamanua kumabele baga. Aigalaian Sipulugege imageret tubukku,

¹⁷ aipoi ta kalulut pugepgeman kumasusubu, samba leu ta kalulut tatabbona matakku pugepgeman.”