Job 22 - BUKO SIPUNENAN

PATIBOAT SIKATELU 22:1–27:23 Elifas

¹ Lepa kuanangan si Elifas,

² “Katalagat sirimanua, ta'anai beri sia sara sibara katukaunan katubut Taikamanua. Sirimanua bulat simaagai patuat sarat tubunia le ipasisikeli.

³ Ai pa katukauanannia ka Taikamanua, ke nugalaiake siobat bagaNia? Ai pa uktukNia, ke makolou puririmanuam?

⁴ Kalulut lotonu ka Taikamanua pa iukumake ekeu, samba iabbit ekeu ka pakaroat?

⁵ Tapoi kalulut kopet igit jom le, samba bulat makatai sigalai samba paraboatnu.

⁶ Ke ta ralului utakda sasarainam, rauraunungan sangamberi leppeira.

⁷ Sirimanua simasaggo ta anukau lo'ra, samba ka simalaje ta anusogai sia mukom.

⁸ Pakeinungan puaabeunu samba gegem masiala sangamberi polak.

⁹ Koiniakenungan ratuitui tai lumang sita'abbinen, samba bakbakngakenungan kabeira siputata'ina.

¹⁰ Iate lulunia ibobokko ekeu sesere, samba tuge'geake ka pulotokat sinulut.

¹¹ Magegepgepman le gogoi, ta'an nuinco mata, maloulounungan iorak ekeu eba sabeu.

¹² Ta' pa Taikamanua le' masikukudduiji manua simabuak, samba masiitco ka repe, ka sangamberi panyanyat simakope buak?

¹³ Tapoi parerenungan, “Aponia agai Taikamanua” Momoi pa ipasiukum ka beliu tanai rusa simagepgep?

¹⁴ Tanai rusa masisalokiNia, bailiu tat momoi ipasiitco, puenungnangan ka sanganantat liot manua!

¹⁵ Taleu nuoba le masitut enungan siburu, sienungienda sirimanua sikatai?

¹⁶ Tuoppu sia ainan ta'pei aiaili gogoi kamateiatda, samba raggaiakenangnan sia eba.

¹⁷ Sia te sipasikukua ka Taikamanua: Putuitui katubumai! samba: Aponia momoi igalai katubumai Sipulugege?

¹⁸ Tapoi Nia leu masisusunake ka lalepmai sangamberi simaeru, tapoi isiakenenda sirimanua sikatai mareunannia katubukku.

¹⁹ Itcorangannia sirimanua simatopit samba puangkarangan baga, geigeirangan sia sirimanua sita' sele.

²⁰ Bulatnia, atusubuakean saggakmai, samba apa sipulelegei ka sia asapprungan ilabonia obengan.

²¹ Ale, Job, paaban le kai Tuhan, bule nusese pusanangan. Ke nugalaiake nenda, bulat babara te uktuknu.

²² Silo' le apa sigelaiakenen Tuhan katubum, koiri le sangamberinia nenda kabagat patuatnu.

²³ Ke nubauake patuatnu katubut Sipulugege, samba nuepeake patuatnu, samba nuareuake patajuat kabagat sapounu,

²⁴ masiribbaiake luikut mas ka abu, mas Ofir ka tengan bagat oinan simagagarak,

²⁵ Eddangan Sipulugege ibailiu masnu, samba peraknu bulat simalainge.

²⁶ Oto momoi numatonem baga simariuriu ka Taikamanua, samba nuagainia Nia le bakkat pusanangannu.

²⁷ Ke manindou ekeu katubuNia, arepinangan leu panindogatnu, samba oinangan nulului sangamberi palelengannu.

²⁸ Ke nuteuake masigalai sara galajetnu, oinangan nugalaiakenia kele sipinatum, samba pato simatoro masitoroiji sangamberi enungannu.

²⁹ Kalulut Taikamanua masiepeake sirimanua simabuak patuat, tapoi simaepe patuat tuarauake.

³⁰ Sirimanua sita' sele ibelaake sia, anubela kalulut pulilinat kabeinu.”