Job 21 - BUKO SIPUNENAN

Job

¹ Aleginangannia si Job,

² “Arep kam sipulelelek kuanenku, samba eddangan ibailiunia nenda pusuibiatmui.

³ Obaake kam kupanibo, lepa nenda momoian nupololoi kam!

⁴ Katubut sirimanua pa kukakau goluku? Angoi tamomoi kupungu'ngu?

⁵ Itco kam aku, makikisei te ka bagamui, samba kaumuian kabeimui masipetpet ngungumui!

⁶ Ke kupaatu bai puririmanuangku nene, pugeretnangan tubukku kalulut loto.

⁷ Angoi mariuriu rapuririmanua sirimanua sikatai, ibailiu mabaja', samba tuppainangan ron tubutda?

⁸ Reddenanda mariuriu mukuddu ka tubutda, samba pasikelirangan leu sapunuteteura.

⁹ Masanang pulalalepda, ta'anai pulotokat, ta ikakau Taikamanua pugejaat baga katubutda.

¹⁰ Tuppainangan iginia tarimeura, samba malabbei iputoga.

¹¹ Tatogatda raobaake rabela kele biribiri, muantat le sia tatogatda.

¹² Puurairangan sipaalei rebana samba kecapi, samba muangka baga siripot urai seruling.

¹³ Tataakerangan gogoira kabagat sanang puririmanua, samba matei sia kabagat arau baga.

¹⁴ Tapoi kuarangan ka Taikamanua, “Areuake tubum katubumai samba kenan katuitui! Ta koba kuagai kai sangamberi enunganNu.”

¹⁵ Aponia nenda Sipulugege, pat panindoumaian katubuNia, samba aponia katukaunannia kakai, ke manindou kai katubuNia?

¹⁶ Kirenangan, ta ka ron tubutda aibara pueerut puririmanuanda! Sipinaatutda sirimanua sikatai mareunannia katubukku.

¹⁷ Bulat mareirei tupeake alitotda sirimanua sikatai, iorak sia kamateiat, samba pangoringan irubeiake Taikamanua katubutda kabagat goluNia.

¹⁸ Bailiunangan sia kele legei siperakat ka matat rusa, kele abu iburutnakenia rusa talabari.

¹⁹ Kuamuian, “Taikamanua masiukum tatoga kalulut jot ukkuinia.” Tapoi kuakungannia: Sirimanua si jo nenda le iuukumake Taikamanua, bule raagainia kalulut jotda, bailiu akenangan ukumanNia Taikamanua.

²⁰ Siripokatnia matatda le masiitco kamateiatda, samba sia le masilo' sibara ka golut Sipulugege!

²¹ Kalulut kipangan ioi ipuuku saeppunia ke amateiannia, ke asapprungan tetere laggonia?

²² Momoi pa sirimanua masigelaiake Taikamanua, beringan siukumake sirimanua sikuddu ka manua Taikamanua le?

²³ Matei sia sara kabagat ron tubu, kabagat sanang samba angkat baga,

²⁴ mamo'mo tengania kalulut tabe, samba maron peile sangamberi unou tolatnia.

²⁵ Sabagei matei kabagat besit patuat, sitainanam pusanangan.

²⁶ Tapoi kabagat ratei, makere raperep, ipapuruni sia leiti.

²⁷ Bulatnia, kuagai paatuatnu, samba sangamberi pukakatai isiakenennu katubukku.

²⁸ Kuanungan: Kaipa lalepda sipuute? Kaipa sapou kudduatda sangamberi sirmanua sikatai?

²⁹ Ta'pei pa anurereake kam ka sirimanua situsasabau ka enungan? Ta pa matonem bagamui katuareman sisegeakenenda?

³⁰ Kuarangan, “Ka gogoi iake ukumanNia Taikamanua, tuarauake le sirimanua sikatai.”

³¹ Kasei masiasoli sigalainia, samba masiukum sigalainia?

³² Tuabbit le nia ka ratei, samba rateinia rajago sirimanua.

³³ Ka bagat pusanangan tutabbonia polak simatobbou, senen sirimanua masitutnia, samba sipuboboiki ka sia ta iagai taadde igitda.

³⁴ Apate tatat lulunia pusuibiatmui katubukku! Sangamberi alegiatmui sarat patajuat le!”