Job 2 - BUKO SIPUNENAN

Sanitu masisibo minca si Job

¹ Ka sara gogoi moi tatogat Taikamanua ka matat Tuhan samba ai leu et sanitu katalagatda.

² Iageti parerenangan si Tuhan ka Sanitu, “Kaipa anubara?” Aleginangannia sanitu, “Barakku ka puenunganan masigejengi polak.”

³ Parerenangan si Tuhan katubut Sanitu, “Taleu anulelekngake paguguletKu si Job? Kalulut ta anai berisara sirimanua ka polak kele nia, simakope topit samba simaroipo, simaloto ka Taikamanua samba siareuake tubunia ka pukakatai. Maom bagania kabagat putotopitnia, kenanen anuna'naan Aku numateiakenia sita' paluluat.”

⁴ Lepa aleginangan sanitu, “Enga samba aroi tubu peile maeru ka pukayoat. Raoba peile itata' pukayoatda, tapoi ainia muririmanua simariuriu.

⁵ Ke Nubesiki bai tubunia, pateleijinangan leu Ekeu!”

⁶ Iageti kuanangan si Tuhan ka Sanitu, “Kauan, galaiakean siobanu katubunia, tapoi bui' numateiakenia.”

⁷ Lepa tuitui Sanitu ka matat Tuhan, samba kaunangan lubbe ka sangaliot tubut Job barania ka bukkut rere pat aili ka ute'nia.

⁸ Lepa kuddu si Job ka pasiribbaijat, samba alanangan siragatat irabak tubunia.

⁹ Kuanangan sinanalepnia katubunia, “Kipa ioi numariuriu mutopit ka Taikamanua” PateleijinganNia, lepa matei ekeu!”

¹⁰ Aleginangan si Job, “Kele sitapatuat nupanibo! Sarat simaeru le pa tasisilo sibara ka Taikamanua, tapoi ta taoba masisilo sikatai” Oto, aisiloan sangamberi pangoringan nene si Job, tapoi ta aibelaake tiboietnia isaggangi Taikamanua.

Saalei Job moi sia masiailiakenia

¹¹ Pangoringan siorak si Job araarepman si telu saaleinia, iate si Elifas sibara ka laggai T'eman, si Bildad tai Suah samba si Zofar tai Naama. Makerenangan bagatda raei masibalou samba masipusuibi bagania.

¹² Tapoi kateteret aipeile sia ka reunan araitconia, ta'an makope raagainia. Pusourangan simakope samba biritnakerangan leppeira samba leu garaiakerangan abu ka pata samba ka ute'ra.

¹³ Pitu ngagogoi samba pitu ngasoibo arakuddu ka polak, ka bebet Job, ta anai berisara arabelaake tiboietda, kalulut raitco kopet beunan pangoringannia.