Job 19 - BUKO SIPUNENAN

Job

¹ Tapoi aleginangannia si Job,

² “Pigamoian le burunia nubesiki kam patuatku, samba nupaoreiji kam aku katiboietmui?

³ Amareireian nupaloloi kam aku, samba ta maila kam masipaoreiji aku.

⁴ Ke bulatnia mapepe aku, oto aku le masibabairat kapepeatku nenda.

⁵ Ke bulatnia obamui masiabeuake tubu katubukku, samba nugalai kam pangoringanku sibailiu toggaiat puseleatku,

⁶ agai kam, aigalaian Taikamanua sitaimaroipo katubukku, samba inga'ngaake jaloNia katubukku.

⁷ Betukungan tubukku kalulut katai goluNia, tapoi berisara sirimanua masipuletsei aku. Pugereikungan, “Kaipa le katuroipoat,” tapoi ta'anai siarepi aku.

⁸ Taikamanua masipetpet enunganku, ta momoi kutusabau, galainangan imagepgep enunganku.

⁹ Aigolokngan Taikamanua puaabeuku samba masiraurau toggaiat puaabeu ka ute'ku.

¹⁰ Pakatainangan aku ka sangamberi kudduat, pat tata' aku, samba kele iburau loina, iburau karonietku.

¹¹ Bulat abeu goluNia Taikamanua katubukku, kaunangan aku sibailiu saggakNia.

¹² SaladduNia mei pasaggak simakere, kekrerangan enungan rasaggangi aku, lepa goilikrangan sapouku.

¹³ Reunanakenangan sasarainangku katubukku, samba taiagairangan aku saaleiku.

¹⁴ Areuakerangan tubutda sangamberi muntogatda sasuruakku, sangamberi saaleiku ta'an rarepdep aku.

¹⁵ Paguguletku sinanalep aikalipogingan aku, tuanda, kaunangan aku sirimanua taiagaietnia.

¹⁶ Sogaikungan paguguletku, tapoi ta aialegi, kenanen kuna'nania simamoile.

¹⁷ Sinanalepku mugelek masiping butet engangku, sasarainangku ta roba masilegeri aku.

¹⁸ Paloloirangan aku tatoga ka enungan, ke murio aku, gagatirangan aku.

¹⁹ Sangamberi saalei simalegre katubukku mangau katubukku, samba sia simanuntu bagaku, masisaggangi aku.

²⁰ Tolatku tuettet ka kulit samba ka akkulaku, samba bakkat sotkungan le amulegei katubukku.

²¹ Ale kam saaleiku, kau imanuntu bagamui katubukku, kalulut kabei Taikamanua masibo'bo aku.

²² Angoi nukukukru kam aku, kelean le Taikamanua, samba ta memengtek kam masikom akkulaku?

²³ Oh, ke tusurat bai sikuakku, tusuratnake kabagat buko,

²⁴ rakau laba pasipaek rasuratnia ka bukku, bule imatom ka sanganantat tetere.

²⁵ Tapoi kuagai: Aimuririmanua Sipanebuiku, samba kalepakatnia tusurunangan ka uddut abu.

²⁶ Kenanen ilubbe samba ipukpuk kulitku, tapoi ka burunia ibara tubuku kumamattai le Taikamanua.

²⁷ Itcokungan te geti imare're katubukku, mataku le masiitco samba ta sabagei. Patuatku mangorik kalulut reureu baga.

²⁸ Ke nukua kam: Tupakaroakenia samba sesemaian katubunia paluluat pakaroatnia!

²⁹ Kau numaloto kam ka lanjau! Kalulut mugolu le Taikamanua samba iukum sirimanua si jo, iageti agaimuiannia, ai Taikamanua sipasiukum sirimanua.”