Job 18 - BUKO SIPUNENAN

Bildad

¹ Iageti aleginangannia si Bildad,

² “Ale Job, pigamoian le nuariake manibo? Mengmengake ekeu, samba arepmake kupanibo kai kineneiget.

³ Angoi nukau kai kele tarimeu? Angoi nukakau kai kele sitaiagai patuat?

⁴ Pugolukatnu sibesiki tubum le. Kalulut ekeu pa itutata'ake sikudduiji polak, samba itupariritci sangamberi leleu ka kudduatnia?

⁵ Alitotda sirimanua sikatai tupepeake le, samba obengannia ta'an tuoobekngake minca.

⁶ Pato kabagat sapounia ibailiu magepgep, alito pasipatonia ta'an mutotoro.

⁷ Bakkou rerenia simaron ibailiu ipare're', sipinatunia masibaraake kabelekatnia.

⁸ Puenungnangan kabagat jarik, iageti sakkutnangan rerenia.

⁹ Alanangan taddania sesere, bailiu kuddunia sedda.

¹⁰ Talit sesere simalipput ka polak, ka enungan, enungiennia.

¹¹ Sirimanua sikatai tuge'geake sia kalotoakenen ka sangamberi matat rusa, samba kukrunangan sia kaipa eijananda.

¹² Siburu maron tubunia, kineneiget mangorik le nia, ipaalei le nia pugejaat baga ka senen kudduat.

¹³ Komnangan kulitnia besi' simalabbu, kabei samba rerenia butek isuaijinia.

¹⁴ Tugiritnakenia barania ka sapounia, ka kudduatnia simasanang, lepa tuabbitnia katubut rimata kamateiat.

¹⁵ Kineneiget momoian rakuddu kasei pa ka sapounia, samba sedda tukarapmake muno, pasimatei besi'nia.

¹⁶ Magaraknangan sangamberi ungatnia manteinangan leu sangamberi ratnia.

¹⁷ Tata' repdemen katubunia ka polak, ta'anai berisara sirimanua ka polak sirepdep oninia.

¹⁸ Tukeklenia barania ka pato iei kabagat pugepgeman, samba tutuituiakenia ka polak.

¹⁹ Ta'anai togania samba reddenannia, berisara sipulelegei ka laggainia.

²⁰ Tuge'gerangan sipulalaggai ka isit kabelakat sulu raarep enungan purimanuaiatnia, samba malotorangan sipulalaggai ka isit kabelaiat sulu.

²¹ Kisedda te enungan purimanuaiatda sirimanua sikatai, sitaipuletsei Taikamanua.”