Job 16 - BUKO SIPUNENAN

Job

¹ Tapoi aleginangannia si Job,

² “Amareireian kuarep kele nene, paoreijat le pusuibiatmui.

³ Pigamoian le nuariake kam titiboat sita' paluluat nenda? Aponia situbbui kam nuake kam alegiat?

⁴ Kaku leu et momoi kupanibo kele kakam, ke ai bai kam ka kudduatku, silikkungan tiboiet simaeru katubumui, samba pagilikkungan uteku katubumui.

⁵ Paronkungan patuatmui pasamba tiboiet nganturat, sangamberi tiboietku siake pusuibiat.

⁶ Ke manibo aku, ta mananangka pangoringanku, ke mutangeu aku, aponia katukolobatnia?

⁷ Taikamanua, masigalai kumasaggo, sangamberi saeppukku aisubuakean.

⁸ Nia masikeraake samba masilaba aku. Kineneiget bulat amakainangngan tubukku, samba nenda te toggaiatnia ka sirimanua simigi bulatnia amajongan aku.

⁹ Ka bagat golu pabiritnangan tubukku Taikamanua, mattainangan aku bulat ka lagat bagaNia.

¹⁰ Bukaakerangan ngungunda sirimanua rageigei aku, purutdangan aku samba bo'borangan bailatku.

¹¹ Kaunangan aku Taikamanua ka kabeira sirimanua sikatai, samba beleakenangan aku ka kabeira sirimanua sikatai.

¹² Purimanuaiatku siburu maaman samba maeru, tapoi sagganginangan aku Taikamanua sige'ge. Tarakupnangan te'tekatku samba ribbaiakenangan aku, bailiuakenangan aku pakoketNia.

¹³ Sita' katet baga ipapanaiji aku, pat bela tinanaiku.

¹⁴ Pabiritnangan aku, isaggangi aku kele sara saladdu simagege.

¹⁵ Pakeikungan goni toggaiat reureu baga, samba kuddu ka pasiribbaijat kalulut akumakala.

¹⁶ Matakku bonan kalulut pusosou, akkekeilukku mugo'samba musurou.

¹⁷ Tapoi ta akugalai sikatai, makoinongnangan linania panindogatku kai Tuhan.

¹⁸ Ale polak, bui' nulipputnake pukakatai katubukku, bui' numengmengake gereiku masitiddou puroipoat.

¹⁹ Kuagai siropmake aku ai ka manua, Nia masimunengake tatat jokku.

²⁰ Geigeirangan samba gagatirangan aku saaleiku, ai aku musosou ei aku ka matat Taikamanua masitiddou paroman.

²¹ Bule Nia masitakkiake pakaroat sirimanua pasamba Taikamanua, samba sirimanua ka pasasambania.

²² Rurakku sipulelegei ta'an maigi, ta'an mauju kutuitui samba ta'an totoili minca.