Job 15 - BUKO SIPUNENAN

PATIBOAT SIKARUA 15:1–21:34 Elifas

¹ Iageti aleginangannia si Elifas,

² “Siboboi le, Job, tiboietnu bulat sita'anai katukolobat!

³ Ta anai sirimanua simaagai sipasialegi kele ekeu nene, ta iseseake tubunia ka titiboat sita'anai katukolobat.

⁴ Ke tututnake bai tiboietnu nenda, ta anai sia berisara simaloto ele manindou minca ka Taikamanua.

⁵ Sangamberi tiboietnu masipakoinong bulat masele ekeu, tapoi tabbonungan pukakatainu nupaigi titiboatnu.

⁶ Ngungum le masiseseleake ekeu, ta aku, bibom le ibailiu sipasimuneng siasoli ekeu.

⁷ Nupaatu ekeu pa sirimanua sipututu'tu mata siboiki? Ai pa ekeu kateteret aitubaraake paleleu-leleu?

⁸ Anuarep pa aigalai sipinaatuNia Taikamanua? Sarat ekeu pa sirimanua sibara pusisikut patuat?

⁹ Sangamberi siagainu, kuagai leu et kai, sangamberi siagainu, makolou leu et kakai.

¹⁰ Katalagamai ai leu et simaubat samba simabaja, simaigi rura bele peile igit rurat ukkuinu.

¹¹ Angoi maila ekeu masisilo pusuibiat Taikamanua? Kupanibo kai kabagat ombaga samba simamoile kabagat oniNia.

¹² Tapoi pugolunungan, makatainangan pumataatnu,

¹³ pugolunungan katubut Taikamanua samba asolinunganNia.

¹⁴ Bulatnia pa ta masele sirimanua? Momoi pa tusineseatnakeni ka matat Taikamanua?

¹⁵ Beringan ka malaika leu ta matonem bagania Taikamanua, ta malina sia ka mataNia.

¹⁶ Sarapei sirimanua bulat sikatai samba kasitsitnakenen, sikoilo pukakatai kele oinan le.

¹⁷ Arepmake Job, ai sara kolouakenenku katubum,

¹⁸ sigelaiakenenda sirmanua simaagai katubukku. Aisilo nganturat nenda sibara ka taikebbukatnia, samba turiuriuake simakolou ka reddenannia.

¹⁹ Kateteret nenda ta anai siooiake ka laggaira, ta anai sipepeake sia ka Taikamanua.

²⁰ Sirimanua sikatai masipaoreiji pasasambatda, mukarat baga ka burut purimanuaiatnia.

²¹ Sangamberi nau sabeu sitakkepmake talinga, kateteret pusanangan oi sipasiraurau masilaba'nia.

²² Ta anai karoniet ka sia ikeraake pugepgeman, kalulut lanjaura sipamamatei masikukrunia ka senen tetere.

²³ Sangamberi uma' seggu masingena gogoi kamateiatnia, rapakomi tubunia simamatei. Iageti againangannia besi'nia purimanuaiatnia ka gogoi sibabara.

²⁴ Gejat baga kelean le rimata simagege, simatarek masilaba'.

²⁵ Kisedda te enungan purimanuaiatda siasoli Taikamanua, samba simagege masisagangi Sipulugege.

²⁶ Ka buak patuat sagganginangan Taikamanua, pakeinangan korabbinia sipalalakke simakeppu.

²⁷ Aikauan tabe tabbot matania, samba kauanangan lakket tabe ka tengania.

²⁸ Kuddunia ka sangamberi laggai simararagat, ka sangamberi lalep sita'anai sikudduijinia. Sangamberi laggai nenda atuteuakean ibailiunia laggai simakakatai.

²⁹ Pukayoatda sirimanua nenda tata' le berisara mulegei, bibilet nia leu sappru.

³⁰ Tamomoi ibela ka pugepgeman, obengan leu masikasakngake sangamberi sinulania. Masubunangan leu et kalulut enga siulupmakenen ngungun Taikamanua.

³¹ Ke matonem bagania ka sita'anai katukolobat, atupabokoiannia, samba upa siloketnia, ta anai leu et katukolobatnia.

³² Ta'pei aiaili teterenia, mateinia, kele ran simalaju sitaioi imalibbut minca.

³³ Kele loinat anggur iragat buania le nia, kele loinat zaitun sigolok sibotconia.

³⁴ Sirimanua sikatai ta murereddenan, tata' le imalabo lalep sigalainia sibara ka bulagat sitaimaroipo.

³⁵ Sia te siisiake pukakatai samba sigalaiakenia, sarat patajuat le ka patuatda.”