Job 13 - BUKO SIPUNENAN

¹ Sangamberinia nenda akuitcoan samba akuarepman, samba bulat akuagaian.

² Apa siagaimui, kuagai leu et, bui' nukua kam makala aku katubumui.

³ Tapoi patitibo kai pasamba Sipulegege, ai oba'ku masikolouake pakaroatku ka matat Taikamanua.

⁴ Kam le sirimanua sitabbo pabokoat, sipukerei tubuna le kam sangamberimui.

⁵ Ke ta bai manibo kam, ele rakukua pa kam simasiku patuat.

⁶ Oto arepmake le paasoliatku, lelekngake kam kuseseake tubukku.

⁷ Momoi pa nupaboko kam ka onin Taikamanua? Momoi pa nupaboko kam sibailiu puuktunganNia?

⁸ Momoi pa numare're kam ka Taikamanua, samba nuropmake kamNia ibailiu kam sipasikeli pakaroatNia?

⁹ Ke ilelekngake kam Taikamanua, maeru leu pa? Momoi pa nupabokoiji kamNia kele nupabokoiji kam sirimanua?

¹⁰ Ke mare're kam, kenanen sipinalipputnakenen, ukumakenangan geti kam simakope Taikamanua.

¹¹ Ta pa makisei ka bagamui ka pulatsanan Taikamanua? Samba muloto tubuNia?

¹² Sangamberi panganturatmui kele kujuk sita'anai katukolobat, samba korabbimui kele polak leleu simaraganen.

¹³ Kalulut nenda mengmengake kam, eddangan kupanibo! Eddangan ipuaili apapa katubukku!

¹⁴ Matarek aku masikau engangku!

¹⁵ Itco pei kam, imamateiakean le aku, ta anai karonan kaku! Tapoi kuseseake le paraboatku ka mataNia.

¹⁶ Nenda te siarauake aku, Tapoi sirimanua sikatai ta magege sia mei ka mataNia!

¹⁷ Kineneiget arepmake kam sipulelek tiboietku, lelekngake kam kolouakenenku.

¹⁸ Kutitiboian le pakaroatku; matonem bagakku, sineseat le aku!

¹⁹ Kasei sioba paukkle katubukku? Kateteret nenda leu et pumengmengkungan samba matei aku.

²⁰ Sarat bui' le nugalaiake rua ngamata nene katubukku, oto ta'an kulilipputnake tubuku katubum:

²¹ Areuake kabeiNu katubukku, samba bui' iorak aku puloloto katubum!

²² Panibo le, aile kualeginia. Ele aku manibo samba Ekeu masialegi!

²³ Kipa beunan puseleat samba joku? Poiliat katubukku pinasabau samba joku.

²⁴ Angoi Nupisikngake matam katubukku? Aponia lulunia Nubailiuake aku saggakNu?

²⁵ Nupalolotoki pa buluk siburutakenen rusa samba masikukru legei siperakat simagarak?

²⁶ Teuakenungan enungan purimanuaiat simapongit kaku, Lumunakenungan puseleatku kateteret silainge peile aku.

²⁷ Appranungan rerekku pasamba letsu laba', sangamberi galai tubuku paitcoakenungannia, samba kaunungan kekre ka bukkut taddaku.

²⁸ Oto bailiunangan aku kele loina simamumukmuk, kele komak sikoman tabbubulut.