Job 12 - BUKO SIPUNENAN

Si Job masiseseake gege samba sikut patuat Taikamanua

¹ Aleginangannia si Job,

² “Kirenangan, kam nene punu tubut sirimanua simigi. Ke matei bai kam, matei leu et sikut patuat.

³ Aku leu et sirimanua sibara patuat, sangamberi sikuamui nenda akuagaian. Samba leu, kasei ta iagainia sangamberinia nenda? Oto, bui' nupaatu kam peile maagai!

⁴ Bailiunangan aku gagatietda saalei samba sasuruakku, kenanen poi sineseat samba sita' sele le aku. Siburu ialegi panindogatku Taikamanua, ke musoga aku masitiddou paroman.

⁵ Paloloimuian sirimanua sikatai puririmanua, purimanuaiatmui geti masanang le, sirimanua simalegre bele kaumuian bobo'bo.

⁶ Tapoi purimanuaiatdra sipararaurau geti ta'anai sigeugeu sia, sirimanua simagege masisaggangi Taikamanua, maeru puririmanuanda. Kenanen sabulungan le ibailiu karoakenenda, sarat ronda le saratda.

⁷ Parere' le ka uma samba ka tarimeu bagei iageti akerangan panganturat katubum.

⁸ Parere' le ka sipungongoingoi ka polak samba ka koat, iageti silonungan geti katukolobat.

⁹ Kasei ta iagainia katalagatda sangamberitda nenda, sibaraake sia iate Taikamanua?

¹⁰ Aile kakabeiNia purimanuaiat sangamberi sipungongoingoi, samba engan senen sirimanua.

¹¹ Kele jalaiku sioba masinanam komen simaeru, kisedda te oba'na talingangku masiarep tiboiet.

¹² Pusisikut patuat ai katubutda sirimanua simabaja'. Tapoi sikut patuat samba ron aile ka Taikamanua. Beringan puaagai kolou ai ka sirimanua sibaja',

¹³ tapoi puaagai kolou samba gege ai leu et kakabei Taikamanua!

¹⁴ Apa siragatnakenenNia ta momoi tugalai minca kasei sitangsiakenenNia ta momoi tubelaake minca.

¹⁵ Nia masipetpet oinan, iageti magaraknangan sangamberinia, Nia masibelaake ipuguruk, iageti oinangan leu eba!

¹⁶ KatubuNia le gege samba kamanangan Aile ka kabeiNia sirimanua sipaboboko samba sirimanua siorak pabokoat.

¹⁷ Buraunangan sikut patuatda saute ka pamarenta, samba sia sipuute bailiuakenangan sia gagatet.

¹⁸ Guiluakenangan rimata samba tangsiakenangan sia,

¹⁹ Epeakenangan tai imam samba sikebbukat laggai.

²⁰ Mengmengakenangan sirimanua siagai manibo, buraunangan sikut patuatda saukkui.

²¹ Pakailanangan sirimanua siabeu tiboi tubu, alanangan gegetda sipuute.

²² Patoakenangan sangamberi kudduat simagepgep, toroijinangan sangamberi ailiggou pugepgeman.

²³ Galainangan rapuurau samba ramakayo tai bangsa, lepa subuakenangan sia pat tata.

²⁴ Bailiuakenangan ipaingo sia saute, bailiu pueppakrangan sita'anai ailiakenen.

²⁵ Pasilulurangan kabagat pugepgeman, samba pare'renangan sia kele sirimanua silo' simapuinengen.