Job 11 - BUKO SIPUNENAN

Zofar

¹ Iageti kuanangan si Zofar,

² “Ta'pa sitapaluluat le takau alegiat? Tusineseatnake pa sirimanua simangamang manibo?

³ Job, nukua pa ta momoi kualegi kainia? Nukua pa mumemengmeng le kai kalulut pageigeiatnu?

⁴ Nukua poi ta masele sangamberi tiboetnu nukua poi malina le ekeu ka matat Tikamanua.

⁵ Tapoi, bule Taikamanuangan le maninibo!

⁶ Samba bule Nia masipaagai katubum, pusisikut patuat nenda maigi katukolobatnia, samba tamomoi raagainia sirimanua. Oto kau nuagainia pangoringannu nene ta malabbu, ke tukireki ka ukuman simateu siloketnu.

⁷ Momoi pa nusinoigi pagalaiat Taikamanua, nuagai kolou tetere kupkumen Sipulugege?

⁸ Buaknia kele manua, aponia momoi nugalai? Kerunia bele peile kerut laggaira tai kabaga bulat tamomoi le nuagainia.

⁹ Geget Taikamanua bele peile nantat polak, samba bele peile liot koat sabeu.

¹⁰ Ke iala samba iabbit ekeu ka pakaroatNia, oto kasei magege masikekreakeNia?

¹¹ Taikamanua iagai sirimanua sioba paboko, samba aile iitco pukakataira.

¹² Ke moi raagai kolou sitaiagai patuat, oto oinangan leu iputu'tu matat togat kalidei simalia sibailiu sirimanua.

¹³ Job, linaake patuatnu, kau iolei bagam! Panindou le ka Taikamanua!

¹⁴ Tata'ake jo ka patuatnu samba areuake pukakatai ka lalepnu!

¹⁵ Iageti oinangan numattai purimanuaiat ka ombaga samba kabagat gege, purionungan simaron samba ta anai loto'nu,

¹⁶ kalipoginungan leu pangoringannu, kele eba simagagarak, rakalipoginia sirimanua.

¹⁷ Matoronangan purimanuaiatnu bele peile torot sulu sinago, samba teteret simagepgep ibailiu kele toro simansep.

¹⁸ Maronnungan samba sun pukakaronan, jagonangan ekeu Taikamanua bailiu masanangnungan.

¹⁹ Ta an maloto ekeu ka saggak, maiginangan sirimanua sipasitiddou paroman katubum.

²⁰ Tapoi sirimanua sikatai paingonangan sia raitco ekeu, kalulut ta'anai ka sia paroman. Sara le karonienda iate bule maruei ioi kamateiat.”