Job 10 - BUKO SIPUNENAN

¹ Aingauan aku ka purimanuaiatku, kubebelaakean le ngunyukku, maninibongan le aku kabagat pongitnia patuatku.

² Ale Taikamanua, bui' Nuseleake aku kolouake le angoi Nusaggangi aku.

³ Aponia uktuknia ke paorei Ekeu kele nene, samba masiribbaiake sigalaiNu? Aponia uktuknia ke Nuropmake pinaatutda sirimanua sikatai?

⁴ PasiitcoNu ta makere rapasiitco sirimanua

⁵ samba ruram ta kele tetet rurat sirimanua.

⁶ Ke kisedda, angoian le nugaba sangamberi puseleatku? samba angoian le nutitiboi jokku?

⁷ Siripokatnia anuagaian, ta masele aku, samba berisara sirimanua siooi masiarauake aku ka kabeiNu.

⁸ Aku nene sigalai kabeiNu, tapoi angoian le Nusubuake aku?

⁹ Repdep le sibara ka polak le anugalai aku! Angoian le Nubailiuake aku minca abu?

¹⁰ Obaakenungan igalai aku ukkuiku samba uraunungan aku ka suruket inangku.

¹¹ Kaunungan kulit samba akkula katubukku, galainungan tubuku sibara tolat samba ungat.

¹² Akenungan purimanuaiat samba nuntut baga katubukku, jagonungan engangku ka pupasikelananNu.

¹³ Tapoi kineneiget kuagaian ka burunia nenda, ainupakekele sipinaatum kamateiatku.

¹⁴ Jagonungan aku babara poi kugagalai puseleat bule nukera nuake katuappekat.

¹⁵ Ke kugalai jo, bulat makatainangan enungan purimanuaiatku! Tapoi ke ta makatai sigalaiku, mariuriu le rakua aku sigalai jo! Ta magege aku masiakkatnake uteku, kalulut sou baga samba paloloiat.

¹⁶ Ke kuakkatnake uteku, kukrunungan aku kele singa. Samba patoilanungan minca gegem kiseiakenen katubukku.

¹⁷ Sarat Nuake sipasimuneng masilawan aku, samba tuppainangan beunannia golu'Nu katubukku. Akenungan sangamberi saladdu sibau masisaggangi aku.

¹⁸ Angoi nuobaake iputu'tu matakku ka polak? Maeru peile kumatei kepei raitco aku sirimanua!

¹⁹ Oto kele ta amutu'tu le matakku kalulut barakku ka suruket riuriu turateiake.

²⁰ Ah, ta'an mabuburu kumatei, oto obaakean le aku sarakku, bule ioi kunanam legei tetetere purimanuaiatku nene.

²¹ Ta'an mabuburu kutuitui samba ta'an totoili minca masiailiake laggai simagepgep,

²² laggai simagepgep, simasun ailiggou samba pukakatai, simakere pato ka pugepgeman.”