Jes. 9 - BUKO SIPUNENAN

¹ Sirimanua sipueenung ka pugepgeman araitcoan pato sabeu; sia sikuddu ka ailiggou ka kamateiat, amutorongan pato katubunia.

² Anubaraakean gorat baga, samba angkat baga sabeu; amuangkaan sia baga kamatam, kele angkat baga kateteret pasimoneiat, kele gorat baga kateteret tuparubei siraurau.

³ Kalulut bairanennia sineineinia samba loina bairanen ka ta'tania samba leu tuturat sipasiorei anubakbakakean kele kateteret katukalaat Midian.

⁴ Aipoi senen tarangaira saladdu sipukukupkup samba senen leppei simalogau ibailiu le geti laboket obengan.

⁵ Kalulut amutu'tuan matat sara toga ka sita, aiakean sara toga simanteu ka sita; ibailiu le nia geti sipaneinei samba oninia rakua sirimanua: Sipangantru simakerek, Taikamanua Sipulugege, Ukkui Sitaitatata, Rimata Paabanan.

⁶ Abeu puparentaatnia, samba paabanan ta'anai kalepaketnia kabagat pupaneineiat David samba kabagat purimataatnia, kalulut ikau le bongen samba pasironnia kabagat puroipoat samba pubulanan barania kineneiget teret buruburu. Tuhan Sebaot te masigagalaiake nene.

Pasiukuman Tuhan ka tai Efraim

⁷ Aibaijukakean tiboietNia si Tuhan kai Jakob samba tiboietnia nenda iorak tai Israel.

⁸ Eddangan raagaina sangamberi sirimanua iate tai Efraim samba sipulaggai ka Samaria, siputitiboat kabagat ukkat samba ka buak patuat.

⁹ “Amakataian kekre sigalai ka batu bata, tagagalai le minca sibara ka bukku sipae'; pataddeijittangan loinat sileu, silittangannia geti loina pinilok.”

¹⁰ Iageti suruakenangan sautet saladdut Rezin si Tuhan rasaggangi sia, samba koiniakenangan sangamberi saggakra rasaggangi sia.

¹¹ Tai Aram sibara ka kabelaiat sulu, samba tai Filistin sibara ka sikaleleu koilokrangan tai Israel kabagat ngungunda sabeu. Kenanen muaili sangamberi nene, goluNia ta'pei leu tatata', samba kabeiNia aipeile tutototoi.

¹² Tapoi paamian nenda ta atoili sia katubuNia sipasiukum sia, samba ta aragaba si Tuhan Sebaot.

¹³ Bailiu tippunangan si Tuhan ute samba paipaira tai Israel, loina samba randa tai Israel kabagat sangagogoi nenda leu et.

¹⁴ Sikebbukat laggai samba sirimanua siabeu tiboi tubu, iate ute. Tai nabi sipasigegelaiake patajuat, iate paipai.

¹⁵ Kalulut sangamberi siuteake paamian nene iate sipasipepeake, samba sirimanua uteakenenda ibailiu masaragai.

¹⁶ Kalulut nenda ta muangka baga si Tuhan kalulut tailaingenda, ta ipununtuki baga sitaina samba tai lumangra, kalulut sangamberitda sipatataju samba sigalai sikatai, samba senen ngungu manibo ka kelat patuat, Kenanen muaili sangamberinia nene, goluNia ta leu et tatata, samba kabeiNia aipeile tutototoi.

¹⁷ Kalulut pukakatai nenda mujulu kele obengan sipasilabo itata bekbek kurut samba parou, lepa labonangan bakkat loina ka leleu bailiu turot kujuk paruru ka pata.

¹⁸ Kalulut golut Tuhan Sebaot, malabonangan polak nenda, samba paamian nenda bailiunangan laboket obengan; beri sia sara sipununtuki baga sasarainania.

¹⁹ Katai kokomra ka isit kai kattoet, tapoi malaje peile sia, komrangan ka isit kai katciu, tapoi ta maektek sia, senen sirimanua masikom akulat aleinia:

²⁰ Tai Manase masikom tai Efraim samba tai Efraim masikom tai Manase, samba sambatda masisaggangi tai Jehuda. Kenanen muaili sangamberinia nene, goluNia ta leu et tatata, samba kabeiNia aipeile tutototoi.