Jes. 8 - BUKO SIPUNENAN

Togat nabi sibailiu toggaiat

¹ Kuanangan si Tuhan katubukku, “Ala sara bukku lei sabeu samba surat ka lei nenda surat simatukle, kise: Maher-Syalal Hash-Bas.”

² Iageti sogaikungan rua sia sipasimuneng sioi tukatonemi, iate Imam Uria samba Zakharia togat Jeberekhya.

³ Iageti paperepakekungan sinanalepku; pusuruketnangan samba tu'tuakenanngan matat sara toga simanteu. Lepa kuanangan si Tuhan katubukku, “Oniakenia: Maher-Syalal Hash-Bas,

⁴ kalulut kepei iagai toga nenda masisogai: Ukkui! Ina! sangamberi pukayoat Damsyik samba siraurau tai Samaria tuambit ka matat Rimata Asyur.”

Pasaggangan Asyur ka Jehuda

⁵ Kuanangan minca si Tuhan katubukku:

⁶ “Kalulut paamian nene ta roba masisilo oinan Syiloah sipuguruk simamoile, samba muloto katubut Rezin samba togat Remalya,

⁷ kalulut nenda, bulatnia te, igalai le geti si Tuhan bagat oinan Efrat simaron samba sabeu, mubuggra katubutda, iate rimata Asyur samba senengmata pulatsanannia; oinan nene mubuggra le geti isaliu sangamberi sopaknia samba muguruk le geti isaliu sangamberi tikrania,

⁸ serta masitebek tuguru ka Jehuda, kele eba sipububuggra pat aili ka lolokkat; samba nga'ngaakenangan kapponia samba tabbonangan geti sangaliot laggainu, ale Imanuel!”

⁹ Agai kam, ale sangamberi bangsa samba tuge'ge kam, lelekake kam, ale ka sangaliot polak, akkik kam tengamui, samba tuge'ge kam; akkik kam tengamui samba tuge'ge kam!

¹⁰ Galai kam isiat, tapoi sangamberinia ta leu et muririuriu; teuakean kam, tapoi ta tugagalaiake, kalulut Taikamanua masipaalei kai!

Si Jesaya buita mulipput

¹¹ Kalulut kise te tiboiet Tuhan katubukku, kateteret aikupkupmake aku kabeiNia, samba kateteret aiparepdep aku, bule bui' kututnake galai tubutda paamian nene:

¹² “Bui nuoniakenia pukerekat baga senengamata kuanen paamian nene pukerekat baga, samba aponia kalotoakenenda bui nukalotoakenia samba bui ipugeret tubumui nuitco kamnia.

¹³ Tapoi Tuhan Sebaot, Nia te bulat seseakenennu sibailiu Sipunenan; sarat katubuNia le numaloto kam samba katubunia le imageret tubumui.

¹⁴ Ibailiu le Nia geti kudduat sipunenan, tapoi leu et ibailiu bukku rapeet bukku katusoksongan ka rua muntogat Israel nenda, samba lei ibailiu sesere samba luluplup ka sipulaggai ka Jerusalem.

¹⁵ Samba maigi te katalagatda situsosoksok, bele sia samba bara siorangan katubutda, tulaba samba tuluplupake.

¹⁶ Buita kukoiriake pasimunengan nene samba kujago nganturat nene ka talagatda sipasiului aku.

¹⁷ Samba kungenaake le si Tuhan silipputnake mata-nia ka muntogat Jakob; bulat kungenaake le Nia.

¹⁸ Bulatnia te, aku samba tatoga siaket Tuhan katubukku iate toggaiat samba ailiakenen katalagatda tai Israel sibara kai Tuhan Sebaot sikuddu ka leleu Sion.

¹⁹ Ke rakua katubum sirimanua, “Tiddou le enungan ka ketsat samba ka sangamberi ketsatda sipasituptup sipakasat tiboiet samba sipungungupngup,” oto alegi le kise, “Ta pa mateu sara bangsa masitiddou enungan ka taikamanuania” Ele bulat ratiddou pa enungan ka sirimanua simamatei uktukda sirimanua sipuririmanua?”

²⁰ “Gaba le nganturat samba pasimunengan!” Kasei ta manibo kele tiboiet nenda, oto ta bebela pato katubunia.

²¹ Mungonyai le sia ka laggai nenda, mugeba samba mulaje, samba ke malaje sia, puinengnangan sia samba teleirangan geti rimatatda samba Taikamanuanda; samba teilarangan geti ka manua,

²² samba itcorangan geti ka polak, samba bulatnia te, sarat puokkiman samba pugepgeman, pureureugat baga sipasiokkip, samba turibaiake geti sia kabagat pugepgeman.

Pututukat matat Rimata Paabanan

²³ Tapoi ta sanganantania ibara pureureugat baga ka laggai situokkip nenda. Ka panandaatnia Tuhan masipaepe laggai Zebulon samba Naftali, oto ka gogoi sibabara abeuakenangan geti enunngan siei ka koat, laggai silat Jordan, kupkumen bangsa-bangsa bagei.