Jes. 7 - BUKO SIPUNENAN

Si Jesaya samba Rimata Ahas

¹ Kateteret si Ahas togat Jotam, togat Uzia, rimata Jehuda, oto si Rezin, rimata Aram, pasamba Pekah togat Remalya, rimata Israel, mei ka Jerusalem masisaggangi laggai nenda, tapoi ta amoi arakalaakenia.

² Lepa paagairangannia ka muntogat David: “Amusapouan tai Aram ka kupkumen laggai Efraim,” oto malotonangan si Ahas samba siberikabaga, kele loina ka leleu ipuuilak iboroinia rusa.

³ Kuanangan si Tuhan katubut Jesaya, “Ambit togam si Syear Jasyub samba kenan nuailiake kam Rimata Ahas. Nuaaili te kam Rimata Ahas ka tutut sopak kolam rubeiat kapata, Kudduatda Sipananamtap,

⁴ samba kua katubunia: Ronake patuatnu samba bui maigi nupaatu, bui numaloto samba bui imagulai patuatnu kalulut ka rua putcut obengan sipukukujuk nene, iate oloi golut Rezin kai Aram samba ka togat Remalya.

⁵ Kalulut Aram samba Efraim pasamba togat Remalya araisiakean sikatai katubum, rakua:

⁶ Sita kam masisaggangi Jehuda samba masipalotoki sia samba leu taoppunia, iageti uddetaketangan togat Tabeel sibailiu rimatatda,

⁷ oto kise te tiboiet Tuhan Taikamanua: Ta muaaili pagalaiat nenda,

⁸ aipoi Damsyik iate inan laggai Aram, samba si Rezin iate Utet laggai Damsyik. Kabagat enem pululima ngarura maragatnangan te geti Efraim, taan ibabailiu minca sara bangsa.

⁹ Samaria iate inan laggai Efraim, samba togat Remalya iate utet laggai Samaria. Ke ta matonem bagamui, bulatnia, ta maroron kam.”

Katuagaiat pagalaiat Imanuel

¹⁰ Kuanangan minca si Tuhan katubut Rimata Ahas, kise:

¹¹ “Tiddou sara toggaiat sibara kai Tuhan Taikamanuam, eddangan toggaiat nenda sibara ka laggaira taikabaga sikuddu bulat ka tei ele sara sibara ka kudduat simakope buak ka pata.”

¹² Tapoi aleginangannia si Ahas, “Ta koba masitiddou, ta koba masisibo si Tuhan.”

¹³ Lepa kuanangan nabi Jesaya, “Ke kisedda, ale muntogat Rimata David! Tapei pa sesege bagamui nusaggoiji kam sirimanua, pat saggoijimuian leu Taikamanuangku.”

¹⁴ Kalulut nenda Tuhan le geti masiaake sara katuaggaiat katubum: Bulatnia te, mususuruket te sara siokko samba tutuakenangan geti sara matat toga simanteu samba leu oniakenangannia Imanuel.

¹⁵ Ilo' le geti susu samba suat mani pat againangan masikeraake sikatai samba masipili simaeru,

¹⁶ aipoi kepei iagai masikeraake sikatai samba masipili simaeru toga nenda, iageti laggai uteakenenda karua rimata kalotoakenennu nenda tukaddiuake le imatangeu.

¹⁷ Ikokoiniake te Asyur si Tuhan masisaggangi ekeu, muntogatnu samba ka sakaumam bailiu gogoi sun pugejaat baga, kele sitapei abara kateteret aituareu Efraim ka Jehuda – iate Rimata Asyur.

¹⁸ Ka gogoi nenda muaaili te: mupiau si Tuhan isogai legu sikuddu ka tu'tut sinoilak bagat oinan Nil, iate saladdu Misir samba isogai mani sikuddu ka laggai Asyur, iate saladdu Asyur

¹⁹ Moi le geti sangamberinia samba tuleu ka su'su simagilak samba ka oilak leleu bukku, ka sangamberi kekre simarui samba ka sangamberi polak putarimeugat.

²⁰ Kateteret nenda pasamba balatu sibale ka silat bagat oinan Efrat, iate Rimata Asyur, sapunangan geti si Tuhan ute samba bulut bakkapat, beringan balatu nenda isappruake leu bulut bakkla.

²¹ Katetere nenda senen sirimanua raurau le geti sangamuneng jaui sinanalep sibau tubu samba rua ngamuneng biribiri,

²² kalulut iginia susu sibaraakenennia, pulorangan susu; bulatnia, sangamberi sirimanua sipulelegei ka laggai nenda mulo susu samba suat mani.

²³ Katetere nenda ka senen kudduat, kaipa simaturere iputu'tu sangaribu loina anggur samba sipusasaki sangaribu bulagat perak, ibailiu le geti kudduat bekbek kurut samba turuturu.

²⁴ Raei sirimanua sedda buita raambit sot silogui samba rourou, kalulut sangaliot laggai nenda asutan turuturu simarui.

²⁵ Samba ta maeme ekeu mei ka senen igrit leleu simatukle tupakru, kalulut loto kabekbek kurut samba ka turuturu; sedda sarat jaui samba biribiri le mumomone.