Jes. 65 - BUKO SIPUNENAN

Alegiat Taikamanua: Ukuman ka sirimanua sijo samba puaraugat ka sirimanua simatopit

¹ Akuobaan masikau enungan ka sirimanua sitaipasirerere Aku; Akuobaan raaili Aku sirimanua sitaipasigagaba Aku. Akukuangan: “Aikoi Aku, aikoi Aku!” ka bangsa sitaipasisosogai oningKu.

² Sanganantat gogoi le Kutotoiake kabeiKu ka suku bangsa simakel paatuat, sienungi enungan sitaimaeru samba situtake sipinatunia sarania;

³ sangamberi suku bangsa sibesiki patuatKu mariuriu ka matakKu, sialei masipanguruatake buluakenen ka sangamberi monen bulungan samba masilabo buluakenen ka uddut pasibuluijiat;

⁴ sipukukuddu ka sangamberi ratei samba sipugogogoi kabagat sangamberi ngaliu; sikom akkulat sakkoilo samba suat akkula kasitsitakenen kabagat koalira;

⁵ sipasikua: “Areuake ekeu, bui' nurape aku, babara ibabailiu ekeu sipunenan kalulut aku!” Sangamberinia nene kele kujuk situkakarai kabagat asakKu, kele obengan sipuobek ka sanganantat gogoi.

⁶ Bulatnia te, aiat sitususurat ka matakKu: ta Kutatangeu tubukKu, tapoi Kubaraake le pasilumunan, oo, pasilumunan katubutda,

⁷ ka sangamberi puseleatda, samba leu puseleatda taikebbukatda, sangamberinia simakere, tiboiet Tuhan. Kalulut aralaboan buluakenen ka uddut sangamberi leleu pasibulujiat samba arapaloloian Aku ka uddut sangamberi tinambu. Kirenangan Kukireki le sia ka leppeira sabeu upa siripot sangamberi sigalaira siburu!

⁸ Kise te tiboiet Tuhan: “Kele rakua sirimanua, ke aipeile oinan anggur ka ottinia: Bui' nusubuake nenda, kalulut kabagania aipeile panukanan! Kisedda te Kugagalaiake kalulut sapaguguletKu, iate ta Kususubuake sangamberinia.

⁹ Kususuruake te geti piga pa tai Jakob samba sirimanua sipasiikepmake leleuKu sibara ka Jehuda; samba bakkatirangan geti sangamberi leleuKu; sirimanua sikokoiKu le ibabakkatinia, samba sapaguguletKu mukuddu le geti sia sedda.

¹⁰ Saron ibailiu le' geti polak simaturuturu addeat ka biribiri, samba su'sut Akhor ibailiu kudduat pereman jauira, sapaamianKu sipasigagaba Aku.

¹¹ Tapoi kam sikaddiuake Tuhan, sikalipogi leleuKu sipunenan, silabbeiake komen ka bulungan Gad, samba sikau anggur sigaluakenen pasamba pusinginan ka bulungan Meni:

¹² Kuteuake le geti numatei kam ka lanjau, samba sangamberimui mulukkuk bule tuja'ja! Kalulut kateteret Akupusoga, ta anualegi kam, kateteret Akupanibo, ta anuarep kam, tapoi anugalaiake le kam sikatai ka matakKu samba noba peile kam sitaiobaket bagakKu.”

¹³ Kalulut nenda kise te tiboiet Tuhan Taikamanua: “Bulatnia te, mukom le geti sapaguguletKu, tapoi nuorik le geti kam pulajeat; bulatnia te, mulo le geti sapaguguletKu, tapoi nuorik le geti kam oggou; bulatnia te, mugora baga le geti sapaguguletKu, tapoi nusilo le geti kam puailaat.

¹⁴ Bulatnia te, mugerei le geti sapaguguletKu kalulut angkat bagatda, tapoi mukatci le geti kam kalulut reureu baga, samba musou le geti kam kalulut belet baga.

¹⁵ Buita nugalakake kam onimui katubutda sirimanua sipilikKu bule itukau sibailiu suppa pateleijat nene: Bule Tuhan Taikamanua ibailiuake ekeu kele sia! Tapoi sapaguguletKu tuoniake le sia ka oni bagei,

¹⁶ bailiu sirimanua sipasisilo geti panukanan ka laggai masitiddou panukanan ka Taikamanua simariuriu topit, samba sirimanua sipususuppa ka laggai musuppa le geti ka Taikamanua simariuriu topit, kalulut puokkiman siburu atukalipogingan, samba amalipputan ka matakKu.”

Palelengan pagalaiat manua sibau samba polak sibau

¹⁷ Kuanangan si Tuhan, “Bulatnia te, Kubaraake le manua sibau samba polak sibau; sangamberi sipuaaili suburu taan turererepdep minca, samba taan mututu'tu minca ka patuat.

¹⁸ Tapoi puangka kam baga samba mugora baga teret buruburu kalulut sibaraakenenKu, kalulut bulatnia te, Kubaraake te Jerusalem simasun gorat baga samba silaggaijinia simasun angkat baga.

¹⁹ Mugora baga le aku kalulut Jerusalem, samba muangka baga kalulut paamianKu; taan tuarep minca sou ka laggai nenda samba katci leu taan tuarep.

²⁰ Taan babara minca sedda toga sigoiso simatete' gogoi puririmanua samba saukkui sitaiaili rurania teret baja', kalulut kasei sipururura sangotu, tuaddeake le sibau tubu, samba kasei sitaiaili rurania sangotu, tuaddeake siorak pateleijat.

²¹ Rarioake le geti lalepda samba leu kudduijirangannia; rapauremi le geti monen anggurda samba komrangan leu buania.

²² Ta raririoake aponia pa, bule rakudduijinia sabagei, samba ta raurep aponia pa, bule rakomnia sabagei; kalulut rurat paamianKu maburu le geti kele rurat loina, samba sangamberi sirimanua sipilikKu rananam le geti sigalai kabeira.

²³ Ta mabebesi' geti tubutda sibboboi samba ta ratutu'tuake matat toga simamatei sinulut, kalulut sia nenda muntogatda sirimanua sisukat Tuhan, samba punuteteura ai sia katubutda.

²⁴ Oto kepei musoga sia, Akualegingan; kateteret aisia maninibo, Akuarepman.

²⁵ Jojot leleu samba togat biribiri mukom le geti turuturu sambatda, singa mukom le geti legei siperakat kele jaui samba ulou murimanua ka abu. Taan babara sigalaiake sikatai samba sipuparaboat sikatai ka sangamberi leleuKu sipunenan, tiboiet Tuhan.”