Jes. 64 - BUKO SIPUNENAN

¹ Kineiget nubiritake le manua samba tugorosotnungan, bailiu pungeungeunangan sangamberi leleu ka mataM

² – kele obengan iobekake loina simagarak samba kele obengan igokgokake oinan – bule itugalai raagai oniM tai saggakNu, bailiu sangamberi bangsa mugeret tubu ka mataM,

³ kalulut Nugalai le siabeu sitaisuksungen bagamai, kele tapei araarep sirimanua barania peile ka siburu!

⁴ Taanai piu sipasiarep, samba taanai mata sipasiitco ai sara taikamanua sigalaiake katubut sirimanua singenaakenia; sarat Ekeu le amasigalaiake kisedda.

⁵ Ekeu masiailiake sia sigalaiake simaeru samba sirepdep enungan sipatoilaNu! Bulatnia te, mugolu le Ekeu, kalulut majo kai; barania siburu mukela patuat le kai katubuM.

⁶ Kisedda te kai sangamberimai kele sara kasitsitakenen samba sangamberi topitmai kele komak simalolit; sangamberimai ibailiu malaju kele buluk samba tata le kai kalulut pukakataimai kele buluk iburutnakenia rusa.

⁷ Taanai sipasisogai onim ele sitususuru sipukakaronan katubum; kalulut Nulipputake le matam katubumai, samba Nukau kai kabagat kupkumen jomai.

⁸ Tapoi kineneiget, ale Tuhan, Ekeu le Ukkuimai! Kai te polak ottot samba Ekeu sigalai kai, samba sangamberimai iate sigalai kabeiNu.

⁹ Oi Tuhan, bui' makope nupugolu samba buian Nurepdep simariuriu jomai! Bulatnia, mattaian kai, sangamberimai iate paamianNu.

¹⁰ Sangamberi laggaiNu sipunenan aibailiuan kudduat simatangeu, Sion aibailiuan kudduat simatangeu, Jerusalem amatangeuan.

¹¹ Umamai sipunenan samba simalatsat, kudduatda taikebbukamai rapasiumun Ekeu, aibailiuan laboket obengan, oto bakkatmai simakope lainge aibailiuan karagatat.

¹² Masiitco sangamberinia nenda, ale Tuhan, kipangan le Nukekeraake tubum? kipangan le nuputatangeu samba masiorei kai simakope?