Jes. 63 - BUKO SIPUNENAN

Ukuman pasilimunan katubut Edom

¹ “Kaseinia sioi sibara ka Edom, sioi sibara ka Bozra sipuleppei simabonan, nia simalainge pasamba leppeinia, sipubakkou kabagat gegenia sabeu? Akute aipalelek puroipoat samba simagege masiarauake!”

² “Angoi imabobonan bibiletNu nenda, samba leppeiNu kele leppei sipasipepera anggur?”

³ “Aku sarakku le amasigalaiake pasiperakat, samba katalagat paamianKu taanai sipaalei Aku! Akuperaan sangamberi bangsa kabagat golukKu, samba Akupaperakingan sia kabagat oloi golukKu; logaura sipububuggra masikitcit leppeiKu, samba sangamberi bibiletKu amalolitnan.

⁴ Kalulut Akuisiakean gogoi pasilumunan samba aiailingan rura pasiukuman.

⁵ Paingokungan matakKu: taanai sipasirorom; tugegekungan: taanai sipasisosopo. Lepa kabeiKu amasiake kaKu paroman, samba oloi golukKu, nenda te amasisopo Aku.

⁶ Paperakikungan sangamberi bangsa kabagat golukKu, subuakekungan sia kabagat oloi golukKu samba logaura sibubuggra muguruk ka polak.”

Panindogat masiseseake jo samba tiddogetda tai Israel

⁷ Kuoba masipaagai nuntut bagat Tuhan, sigalai Tuhan siabeu, siripot sigalai Tuhan katubukku samba pusisikut patuat sabeu ka muntogat Israel sigalaiakenenNia katubutda siripot nuntut bagaNia siabeu.

⁸ Ta pa aikuangan, “Bulatnia, sia te paamianKu, tatoga sitaipuparaboat geti sikatai.” Oto Nia ibailiu Sipaarau sia

⁹ kabagat sangamberi puokkimanda. Ta sara pakoinien ele punutubu, tapoi Nia le masiarauake sia; Nia te amasitebui sia kabagat nuntut bagaNia samba katet bagaNia. Iakkatnake samba ibeila le sia barania peile siburu.

¹⁰ Tapoi mukela patuat le sia samba masireureuake bagat Ketsat SipunenanNia; oto Nia ibailiu saggakda, samba nia le pasaggak isaggangi sia

¹¹ Lepa repdeprangan kateteret siburu peile, kateteret Mose, paguguletNia nenda: Kaipa Nia siambit sia tusakai baratda ka koat sambatda sipasijago biribiriNia? Kaipa Nia sipasikakau Ketsat SipunenanNia kabagat patuatda;

¹² pasamba kabeiNia simaron masipaalei si Mose ka isit kai kattoet; sisila' oinan kamatatda bule ituabeuake oniNia teret buruburu;

¹³ sipalulu sia masienungi koat simalio kele kuro ienungi kudduat simatangeu? Ta isosoksok reretda,

¹⁴ kele tarimeu situgogorosot ka su'su. Ketsat Tuhan masiambit sia ka kudduat puariat. Kisedda te anupalulu paamianNu bule ituabeuake oniM.

¹⁵ Mattai le sibara ka manua samba itco pei sibara ka kudduatNu sipunenan samba simalatsat! Kaipa pasuksunganNu samba gegeM, itubbui patuatNu samba katet bagam? Bule buian nukeraake tubum!

¹⁶ Ta pa Ekeu le Ukkuimai? Bulatnia, si Abraham ta iagai aponia pa pagalaiat kai, samba Israel ta iagai kai. Oi Tuhan, Ekeu le Ukkuimai; onim iate “Sipanebui kai” barania peile ka siburu.

¹⁷ Oi Tuhan, angoi Nuobaake kumapepe kai ka enunganNu, samba angoi Nukelaake patuatmai, bailiu ta maloto kai katubum? Toilingan le kalulut sapaguguletNu, kalulut paamianNu bakkatNu!

¹⁸ Angoi sangamberi sirimanua sikatai masipaloloi kudduatNu sipunenan, tai saggakmai masipaperaki umam sipunenan?

¹⁹ Purimanuaiatmai kelean le aipeile kai kele ka siburu taanai kai kabagat pupaneineiatNu, kelean le ta atukua ka kai onim.