Jes. 62 - BUKO SIPUNENAN

Puaraugat Sion momoian le simaruei

¹ Kalulut Sion tamomoi kutangeu tubukku, samba kalulut Jerusalem ta kutatangeu tubukku, pat putoronangan pubulanannia kele pato samba puobeknangan puaraugatnia kele alito.

² Iageti sangamberi bangsa masiitco geti pubulanannu, samba sangamberi rimata geti masiitco pulatsanannu, samba sogairangan geti ekeu pasamba oni sibau oni siteuakenen Tuhan.

³ Ibailiu le ekeu geti kirit ute siabeu ka kabei Tuhan samba kirit purimataat ka kabei Taikamanuam.

⁴ Taan rakukua ekeu minca, “Sikadiuakenen kalaleman simanteu”, samba laggainu taan rakukua minca “Simatangeu”, tapoi tuoniake le ekeu “Kilibet bagakKu” samba laggainu “Sipusimanteu”, kalulut Tuhan makiliu baga katubum, samba musimanteu le geti laggainu.

⁵ Kalulut kele sara silainge ibailiu simanteu sara siokko, kisedda te Nia sigalai ekeu ibailiu le geti simanteunu, samba kele angkat bagania talimouakenen simanteu iitco sinanalep talimouakenennia, kisedda te angkat bagat Taikamanuam katubum.

⁶ Ka uddut sangamberi iripnu, ale Jerusalem, Akupagalakngan sangamberi sipananaiko. Sanganantat gogoi samba sanganantat soibo, ta geti muaari sia. Ale kam siparepdep Tuhan ka Sion, bui' nupuari kam

⁷ samba bui' nuobaake Nia mukuddu simasanang, teret irioake minca Jerusalem samba teret igalainia ibailiu katuumunan ka polak.

⁸ Amupalelekngan si Tuhan kabagat kabeiNia sikattoet, kabagat gegeNia: “Bulatnia te, taan Kukakau minca gandumnu sibailiu komen ka saggaknu, samba bulatnia te, sangamberi sirimanua siooiake taan geti ralolo suat anggurnu, sibaraakenennu kabagat besit tubu.

⁹ Tapoi sirimanua sigetainia mukom le geti sia samba masiumun si Tuhan, samba sirimanua siruruakenia mulo le geti ka laibokat kudduat sipunenanKu.”

¹⁰ Puenung, puenung ka matatbaliu gugurukat, tarekake enungan paamian, nga'ngaake, nga'ngaake enungan sabeu, ribbaiake sangamberi bukku, rioake sangamberi toggaiat ka sangamberi bangsa!

¹¹ Kalulut nene te aipaarepake si Tuhan pat aili ka tu'tut polak! Kua ka siokko Sion: Bulatnia te, amoian puaraugatnu; bulatnia te, sia sibailiu upa besit tubuNia pasamba Nia samba sia siseseNia muenung ka mataNia.

¹² Kuarangan geti sia sirimanua “Paamian sipunenan”, “Sirimanua sitebui Tuhan”, samba kuarangan geti ekeu “Sigaba”, “Laggai sitaikaddiuakenen”.