Jes. 60 - BUKO SIPUNENAN

Pulatsanan Sion ka gogoi sibabara

¹ Suruake ekeu, kau numapato, kalulut amoian patonu, samba pulatsanan Tuhan mutoro katubum.

² Kalulut bulatnia te, gepgep masilakkup polak, samba pugepgeman masilakkup sangamberi laggai; tapoi patot Tuhan mutoro katubum, samba pulatsananNia matoila katubum.

³ Sangamberi bangsa moi simakere ka patonu, samba sangamberi tai rimata moi le ka patonu.

⁴ Akkatake utenu samba itco ka sangalionia, sangamberitda moi paruru katubum; tatogam taimanteu moi sibara ka sareunan, samba tatogam tainanalep tubeilak.

⁵ Kateteret nenda makisei le bagam nuitconia samba muangka baga, makisei le bagam samba masanang, kalulut pukayot sibara ka silat koat tuake le geti katubum, samba pukayoat sangamberi laggai moi le geti katubum.

⁶ Unta simigi itabbo le geti laggainu, sangamberi unta sibau tubu sibara ka Midian samba Efa. Moi le sia sangamberi sirimanua sibara ka Syeba, rambit le geti mas samba kuamanyang, samba umunakerangan sigalai Tuhan.

⁷ Sangamberi biribiri Kedar paruru le geti katubum, sangamberi biribiri simanteu Nebayot matarek le geti kabagat parurukat panindogatnu; sangamberinia geti tupanguruatake ka uddut kudduat pasibuluat katubukKu sibailiu buluakenen obaket bagakKu, samba Kupalainge le geti uma pulatsananKu.

⁸ Kasei sia nene sitububurut kele tanai rusa samba tuburut kele uma' ngorut ka matatbaliu kubbounia?

⁹ Bulatnia te, Aku te rangengenaake sangamberi tobbou laggai ka sareunan; sangamberi kinapatda tai Tarsis mulajo kamata rambit tatogam taimanteu sibara ka sareunan, perak samba mas aileu araambit, addeat Tuhan, Taikamanuam, samba kalulut Sipululatsat, Taikamanuan Israel, kalulut Nia masilatsatake ekeu.

¹⁰ Ragalai le geti iripnu sirimanua siooiake, samba tai rimatatda ibailiu sipuuku ekeu; kalulut Akuukuman ekeu kabagat golukKu, tapoi kineneiget Akuobaan masipununtuki ekeu baga.

¹¹ Sangamberi matatbaliu gugurukatnu mariuriu le geti itunga'nga, sinago samba sinoibo ta tupapatpat, bule ioi raambit pukayoatda sangamberi laggai katubum, kisedda leu et tai rimatatda tuambit sibailiu tangsiakenen.

¹² Bulatnia, masubu le geti bangsa samba purimataat sitaioba masipaguguletake tubu katubum; sangamberi bangsa nenda tusubuake le itata.

¹³ Pulatsanan Libanon, iate loina katuka, loina balina samba loina pinilok, tuambit le geti sangamberinia katubum, bule itupalainge kudduat uma sipunenanKu, kalulut Kulatsatake le geti kudduat peraket rerekKu.

¹⁴ Sangamberi tatogatda sipaoreiji ekeu moi le geti katubum samba musum, samba sangamberi sirimanua sipaloloi ekeu murekkuk le geti sia ratabi bukkut rerem; raoniake le ekeu geti, “Laggai Tuhan”, “Sion, bakkat Sipululatsat, Taikamanuan Israel.”

¹⁵ Sibailiu silit purimanuaiatnu siburu, kateteret atukaddiuake ekeu, tupulagaki ekeu baga samba taanai berisara sibalou ekeu, Kineneiget Kubailiuake le ekeu geti abeuakenen simatom, ibailiu puangkakat baga teret buruburu.

¹⁶ Nupopot te geti susut tai bangsa, samba nulolo te geti susutda sagamberi purimataat. Iageti againungannia, Aku Tuhan, Sipaarau ekeu, sitebui ekeu sipulugege Taikamanuan Jakob.

¹⁷ Sibailiu silit tembaga ambitkungan geti mas, samba sibailiu silit laba' ambitkungan geti perak, sibailiu silit loina, ambitkungan geti tembaga, samba sibailiu silit bukku, ambitkungan geti laba; akekungan geti aban puririmanua samba puroipoat sipasijago samba sipasikeli purimanuaiatnu.

¹⁸ Taan babara katuareman pagalaiat galajet sikatai ka laggainu, pagalaiat katusubuat ele katukataikat ka sangaliot laggainu; oniakenungan geti iripnu “Puaraugat” samba sangamberi matatbaliunu “Pasiumun”.

¹⁹ Matat sulu taan itotoroiji ekeu kateteret sinago samba torot laggo taan itotoroiji ekeu kateteret sinoibo, tapoi Tuhan ibailiu le geti kekeu toro simatom samba Taikamanuam ibailiu le geti pulatsanannu.

²⁰ Babara te geti kekeu matat sulu sitaibebele samba laggo sitaipepe, kalulut Tuhan ibailiu le geti kekeu pato simatom, samba tukapplunangan geti tetere pureureugat bagam.

²¹ Sangamberi silaggaiji ekeu iate sirimanua simatopit rabakkati le laggai teret buruburu; sia iate kele sinampit siurepakenenKu bule rapatoila pulatsananKu.

²² Bulat sigoiso ibailiu le geti muntogat sabeu, samba bulat sitaioi tubu ibailiu le geti bangsa sabeu simaron; Aku, Tuhan, masigalaiake geti simaruei ka tetere siteuakenen.