Jes. 6 - BUKO SIPUNENAN

Taikamanua masisogai si Jesaya

¹ Ka rura kamateiat Rimata Uzia, itsokungan si Tuhan mukuddu ka uddenan purimataatNia simabuak samba tu'tut leppeiNia masilakkup Uma Sipunenan.

² KabebeNia ai sipuririo tai Serafim sipuoobek kele obengan, senenda ai enem kappora. Rua kappora masitabbo matatda, rua kappo masitabbo reretda samba leu rua kappo rapakei tuburut.

³ Pusogarangan ka pasasambatda: “Sipunenan, sipunenan, sipunenan le Tuhan Sebaot, sangalio polak sun le pulatsananNia!”

⁴ Iageti puuilaknangan kekret matatbaliu Uman Tuhan kalulut gereira tai Serafim nenda samba Uman Tuhan nenda sun leu kujuk.

⁵ Lepa kuakungannia, “Matei le aku! masubu le aku! Kalulut ngungungku malolit kalulut jo, samba ai le aku mukuddu katalagat sirimanua sijo tapoi kenanen kisedda, akuitcoan Rimata, iate Tuhan Sebaot.”

⁶ Iageti sara katalagatda tai Serafim nenda tuburutnangan ioi katubukku aiaambit bot obengan sialania pasamba lalaplap ka kudduat pasibuluat.

⁷ Bekbekakenangannia ka ngungungku samba kuanangannia, “Itco, aibekbekngan ngungum nene, oto puseleatnu atuposangan samba jom atuappeakean.”

⁸ Lepa arepkungan ngangan Tuhan, “Kasei Kukokoiniake Kasei ibabailiu sipasiambit patonekat nene?” Alegikungannia, “Aku nene. Koiniakean aku!”

⁹ Iageti kuanangan minca: “Kenan, samba kua ka sapaamian nene: Arepi kam simakolou, tapoi bui nuagai kamnia! Itco kam simakolou, tapoi bui nupakolou kamnia!

¹⁰ Kelaake patutatda sirimanua nenda, galai le piura masane masiarep samba petpetake matatda, bule taioi rapasiitco pasamba matatda samba taioi rapasiarep pasamba piura sambaioi raagai kolou pasamba patuatda, lepa toili sia katubukKu samba bailiu maalerangan.”

¹¹ Lepa parerekungan, “Piga ngagogoi teterenia ipuaili kele nene Tuhan?” Lepa aleginangannia si Tuhan: “Teret imakatai laggai nene samba ta ibara sikudduijinia, samba ta ibara sirimanua ka sangamberi lalep samba polak ibailiu matangeu.

¹² Ikekele le geti si Tuhan sirimanua ka kudduat simareunan, bailiu sangaliot laggai matangeunangan.

¹³ Samba ke ai mulegei katalagatda seperpulu, buita iorak peile sia sangaminca katusubuat, tapoi purimanuaitda ibailiu geti kele loina sokut sipuririo turonia kateteret itutadde. Sibara ka turo nenda te ibebela sinula sipunenan!”