Jes. 59 - BUKO SIPUNENAN

Jo iate sisaila puaraugat

¹ Bulatnia te, kabei Tuhan ta matete ipasiarauake, samba pasiaarepNia ta mugalai ipasiarep;

² tapoi sibailiu sisaraake ekeu ka Taikamanuam iate sangamberi pukakatainu, samba lulunia ailiputake tubuNia katubum, bailiu taiarepinangan ekeu iate sangamberi jom.

³ Kalulut kabeinu malolit kalulut logau samba singongainu kalulut pukakatai; ngungum masikua pabokoat, jalainu masikua patajuat.

⁴ Taanai sipasiake pakaroat kabagat paluluat sineseat, samba taanai sipasiukum kabagat paluluat simaron; sirimanua masikaroake sitakatukolobat samba masikua pabokoat, sirimanua masisuruketake gejat baga samba masitu'tuake pukakatai.

⁵ Sia masiti'tiake attelut ulou simalaga son, samba masisuilak rumun tailakkak; kasei masikom attelu nenda matei le nia, samba ke tuneinei sangambua imaragat, belanangan leu sangamuneng ulou simalaga son.

⁶ Rumun sisuilak nenda tamomoi tupakeinia sibailiu leppei, samba sigalaira nenda tamomoi tupakeinia sibailiu komak; sigalaira nenda iate galajet patajuat, samba sigalai kabeira nenda iate pukakatai.

⁷ Maruei ragalai sikatai, samba maruei ramateiake sirimanua sitaimasele; isiatda iate isiat patajuat, samba kaipa le raei ragalakake le katusubuat samba karagatat.

⁸ Ta raagai enungan paabanan, samba sirereatda taanai puroipoat; raenungi le enungan simakoilut, samba kasei sipuenung sedda ta iagai paabanan.

⁹ Kalulut nenda mariuriu le imareunan puroipoat katubumai samba pubulanan ta sesege katubumai. Kungenaake le kai pato, tapoi sarat pugepgeman le, masingenaake toro, tapoi muenung le kai kabagat gepgep.

¹⁰ Masilulu le kai rupi kele sirimanua simapeset, samba masilulu kelean le sita'mata; tuluinangan reremai kateteret sinago kele tetere kasoibokat, mukuddu ka gepgep kele sirimanua simamatei.

¹¹ Sangamberimai murou kele beruang; ngangamai maangep kele nau uma' ngorut; kungenaake le kai puroipoat, tapoi taanai, masingenaake puaraugat, tapoi mariuriu le imareunan katubumai.

¹² Bulatnia, jo pukelakat patuatmai maigi kamatam samba jomai masimunengake isaggangi kai; bulatnia, kuseseake le kai pukelakat patuatmai samba kuagai kai pukakataimai:

¹³ amukelaat patuatmai samba paboko katubut Tuhan, samba toili kapasitututmai Taikamanuamai, kuisiake le kai masiraurau samba patajuat, masisuruketake pabokoat kabagat patuat samba masitu'tuake kabagat titiboat.

¹⁴ Surukat atutukkluakean kateitei, samba puroipoat murio ka sareunan, kalulut pubulanan tusoksok ka kudduatda siberikabaga samba linat patuat rakeraake sirimanua.

¹⁵ Oto bailiu mapepenangan pubulanan, samba kasei siareuake pukakatai, bailiunangania raurauget. Tapoi iitco le si Tuhan, bulat makatai kamatania, taanai surukat.

¹⁶ Itsonangannia, taanai berisara siooi, samba makisei kabagaNia kalulut taanai siparorom. Oto kabeiNia le masikau paroman katubuNia, samba roipoNia le amasiropakeNia.

¹⁷ Pakeinangan puroipoat sibailiu leppei laba samba tutu laba puaraugat ai ka uteNia; pakeinangan leppei pasilumunan samba masipakei pasuksungan sibailiu leppei sabeu.

¹⁸ Siripot sigalaira sirimanua, kisedda te iala lumun: oloi goluNia ka sangamberi saggaknia samba ukuman ka sangamberi saggakNia; beringan leu ka sangamberi tobbou laggai simareunan kaunangan leu ukuman samba pulatsananNia ka kudduat kabelaiat sulu,

¹⁹ oto malotorangan sirimanua ka onin Tuhan ka kudduat kabelekat sulu samba maloto sirimanua ka pulatsananNia ka sikalaut, kalulut moi le nia geti kele roirai sibara ka kudduat simaokkip, situkkluakenen engan Tuhan.

²⁰ Moi le Nia geti sibailiu Sipanebui Sion samba sangamberi muntogat Jakob sibauake patuat ka pukelakat patuatnia, kise te tiboiet Tuhan.

²¹ Pagalaiat Aku, nene palelenganKu katubutda, tiboiet Tuhan: KetsatKu sileuleugi ekeu samba tiboietKu siakekKu ka ngungum ta ikakaddiuake ngungum samba ngungun muntogatnu samba ngungun muntogatda barania kineiget teret buruburu.