Jes. 58 - BUKO SIPUNENAN

Putopinan sipinabara samba sibulatnia

¹ Sogaake kam simaron, ba kekeraake kam! abeuake kam ngangamui kele pipiau, paagai kam ka paamianKu puseleatda samba jotda samuntogat Jakob.

² Kirenangan senen gogoi ragaba Aku samba raoba raagai sangamberi enungaKu. Kele bangsa sigalaiake simaeru samba sitaikaddiuake surukat Taikamanuania rererangan Aku pagalaiat surukat sibulatnia raoba malegre katubut Taikamanua, parerenangan:

³ “Angoi ta kupukokom kai samba ta leu et anupulelek kai” Angoi kuepaake kai patuatmai samba ta leu et anupulusetsei kai?” Bulatnia, ka gogoi ta nupukom kam, aipeile kam masigagalai galajetmui, samba aipeile nuubbuake kam paguguletmui.

⁴ Bulatnia te, ta nupukom kam sialei pagolukat samba palaba, pabo'bo samba pabukku siobat bagamui. Kabagat ta nupukom kam kele kisene, ta maarep ngangamui ka kudduat simabuak.

⁵ Bulatnia pa ta nupukom kam kele nene obaket bagakKu, samba masibarake gogoi pasiepekat patuat, ke nulukkukake kam utemui kele popoupou samba masinganangake komak goni samba abu sibailiu lapek pereman? Bulatnia nenda pa kuanennu mupuaso, masibaraake gogoi obaket Tuhan?

⁶ Ta! Mupuaso le obaketKu, iate masibuka palenggui pukakatai samba masirugut appra bairanen,

⁷ bule nupaabo rotimui ka simalaje, masiambit simageba sitaanai lalep ka lalepmui, samba ke nuinco kam sirimanua simabulutut, kaumuian leppeinia samba bui' nupalipput kam tubummui ka sasarainamui!

⁸ Kateteret nenda te ibela patomui kele ibela sulu simanseman samba maalenangan leu maujumui simaruei; pubulanan ibailiu mungkuat simarururu ka matamui samba pulatsanan Tuhan ibailiu mungkuat simaruru ka teiteimui.

⁹ Kateteret nenda te nupusoga kam samba arepinangannia si Tuhan, samba ke mugerei kam masitiddou paroman, kuanangan leu et nia: Aikoi Aku! Ke ta nukau minca bairanen saaleimui, taan nupasasauki sirimanua pasamba singongai samba masipajo,

¹⁰ ke nukau kam ka sirimanua simalaje aponia kiddiet bagam samba nusegeake bagatda situorei, oto belanangan leu patomui kabagat gepgep samba pugepgemanmui ibailiu le geti kele patot torot sulu ka sina'go.

¹¹ Palulunangan geti ekeu simariuriu si Tuhan samba segeakenangan bagam ka polak simagarak samba bauginangan leu ron tubum; bailiunangan geti ekeu kele mone sibara oinan simeru sipuguguruk samba kele bubuakat oinan sitaimagagarak.

¹² Galainungan geti minca laggai simakakatai kateteret siburu peile, paerunungan geti bongen sigalakakenenda piga pa muntogat. Tuoniake le ekeu geti “Sipaeru kekre sipukpuk, sipaeru enungan bule ioi tukudduiji kudduat nenda.”

Masisuru gogoi Sabat

¹³ Ke ta nupaperaki surukat gogoi Sabat samba ta nugalaiake galajetnu ka gogoi sipunenanKu; ke nukua gogoi Sabat “Gogoi puangkakat baga,” samba gogoi sipunenan Tuhan “Gogoi siabeu”; ke nusurunia ta nugalaiake siobat bagam samba nugalai galajetnu ele manibo ekeu sitapaluluat,

¹⁴ oto puangkanungan baga kalulut Tuhan, samba galaikungan geti ekeu nusabau uddut tinambu ka polak pasamba enungan kamanangan; Akekungan geti komennu sibara ka polak muntogat Jakob, taikebbukatnu, kalulut ngungun Tuhan le amasikua.