Jes. 57 - BUKO SIPUNENAN

¹ Masubu le sirimanua simaroipo, samba berisara sirimanua sipuleleknia; matei le sangamberi sirimanua simatopit, samba berisara sirimanua sipuletseinia; bulatnia, kalulut amakakrangan pukakatai, mateirangan leu sirimanua simatopit

² samba tugurunangan ka kudduat simaaban; sangamberi sirimanua sipuririmanua kabagat linat patuat rasese le puariat ka peremannia.

³ Tapoi kam, legreake kam sene, ale tatoga sibara ka tainanalep simatawa ale muntogat sirimanua sipaelet samba sinanalep simaolop tubu!

⁴ Pagalaiat kasei nupaguguileakem tiboietmui, katubut kasei nukau kam tiboet ta sibulatnia? Ta pa kam nene tatoga simakela patuat, muntogat sipatataju,

⁵ ale kam sirimanua simakope botbot tubu ka tei loina buluijiet, ka senen tei loina simalibbut, ale sangamberi sirimanua sijaja tatoga ka sangamberi su'su, kabagat polou sangamberi leleu bukku.

Pasibuluiji sabulungan sibailiu paelenan

⁶ Katubumui sarat bukku simalutlut le sibara ka bagat oinan, samba sarat nenda le siteuakenen kakam; katubutda leu nutotoiake buluakenen siuruakenen, samba masipanguruatake sitattatakenen. Kipa ioi Kuomake pagalaiat nenda?

⁷ Kaumuian peremanmui ka uddut leleu simabuak samba sipusumbulat samba ka uddut leleu nenda leu et nupanatra nupanguruatake kam buluakenen sija'ja.

⁸ Anukauan toggaiat bulungannu kamatatbaliu gugurukat lalepnu, bulatnia, anukaddiuakean Aku samba anubulutuakean tubum, sakaijingan peremannu samba palionungannia; galainungan palelengan katubut piga pa sirimanua obaketnu bule nupaperepake sia samba mattainungan turot bukku.

⁹ Mei leu et ekeu katubut bulungan Molokh pasamba masiabbit tula samba pusinginan simigi; samba koiniakenungan pakoinietnu ratuitui ka sareunan, samba pat aili ka laggaira taikabaga.

¹⁰ Kalulut puenungannnu simareunan masaggonungan, tapoi ta anukua: “Taanai karonan!” Bara ron tubum sibau, kalulut nenda bailiu taimasaggonungan.

¹¹ Kasei katubu numaloloto bailiu pabokonungan samba ta anurepdep Aku ele nupuletsei Aku? Ta pa kalulut taipaninibokKu samba tatabbokKu matatakKu, oto taimalotonungan katubukKu!

¹² Kukukua te geti putopinannu samba sangamberi sigalainu, tapoi sangamberinia nenda taanai lulunia kekeu:

¹³ ke mugerei ekeu, kau rabelaake ekeu sabulungannu! Sangamberitda iboroiake le geti sia rusa, samba iburutake sia enga siulupakenen. Tapoi sirimanua sipukunem katubukKu raikepmake le geti laggai samba rabakkati le geti leleuKu sipunenan.

Tiboiet pusuibiat

¹⁴ Ai sipasikukua: “Nga'ngaake, nga'ngaake, patarek kam enungan, akkatake kam bukku sipasosoksok ka enungan pamianKu!”

¹⁵ Kalulut kise te tiboiet Sipulugege samba Sipululatsat, sikuddu teret buruburu samba Sipululatsat oniNia: “Mukuddu le Aku ka kudduat simabuak samba ka kudduat sipunenan tapoi sambamai leu sirimanua sipangongorik simaepe patuat, samba masirimanuaake ron patuatda simaepe patuat samba masirimanua patuatda sipangongorik.

¹⁶ Kalulut ta sanganantania Kupaukle, samba ta sanganantania Kupugolu, bule bui' imasaggo ron patuatda kamatakKu, tapoi Aku le amasigalai enga purimanuaiat.

¹⁷ Mugolu le Aku kalulut puseleat alau bagania, Kuukum le nia, Kulipputake matakKu samba mugolu, tapoi ikaddiuake le katonemiennia, bailiu enunginangan enungan sipilit patuatnia.

¹⁸ Akuitsoan sangamberi en ungannia, tapoi Kualeake samba kupalululu le nia geti samba paerukungannia pasamba pusuibiat; samba leu ka bibotda sirimanua sipurereureu baga.

¹⁹ Kugalai le geti pasiumun. Aban, paabanan ka sia ka sareunan samba ka sia simalegre, tiboiet Tuhan – Kualeake le geti nia!

²⁰ Tapoi sangamberi sirimanua sikatai iate kele koat simaaruk kalulut ta mariuriu imalebak, samba roirainia masibaraake gopgip samba loti.

²¹ Taanai aban ka sangamberi sirimanua sikatai nenda.” Tiboiet Taikamanuangku.