Jes. 54 - BUKO SIPUNENAN

Palelengan paabanan ka Sion

¹ Pugora kam baga, ale sitaiputotoga sitaitu'tuake matat toga! Puangka kam baga sialei gorat baga samba pugerei kam, ale ekeu sitaipangongorik pususule! Kalulut sikaddiuakenen simanteunia bara le geti togania simigi bele peile sibara simanteu, tiboiet Tuhan.

² Lioake kudduat sapounu, samba nganangake sapou kudduatnu, bui' nungoinia; nantaake sangamberi apprat sapounu samba ibbiake simaron sangamberi turiknu!

³ Kalulut malilio te ekeu kai kattoet samba kai katciu, samba muntogat masisilo geti kudduat sangamberi bangsa, samba masikudduiji geti sangamberi laggai simatengeu.

⁴ Bui' numaloto, kalulut ta nusisilo te puaailaat, samba bui' numaila, kalulut ta te nupuagai tubum. Kalulut nukalipogi le geti aila kateteret sibau tubu peile ekeu, samba taan nurerepdep minca puailaat ka pululumangnu.

⁵ Kalulut sibailiu simanteunu iate Nia sibaraake ekeu, Tuhan Sebaot oniNia; sibailiu Sipanebui ekeu iate Sipululatsat, Taikamanuan Israel, Tuoniake le Nia Taikamanua ka sangaliot polak.

⁶ Kalulut kele sikalalep sikaddiuakenen samba simareureu baga isogai le ekeu minca si Tuhan; kipangan le sikalalep barania peile ka sibau tubu maririuriu itukera? Tiboiet Tuhan.

⁷ Sangapeipeikat mata le burunia Akukaddiuake ekeu, tapoi kalulut nuntut bagakKu sabeu alakungan ekeu minca.

⁸ Kabagat golu sabeu lipputakekungan matakKu katubum kabagat sangapeipeikat matat tapoi kabagat nuntut baga sabeu sitaitatata punutikikungan ekeu baga, tiboiet Tuhan, Sipanebui ekeu.

⁹ Pagalaiat nene Kaku, kele kateteret si Noak: kele Akupusuppa katubunia iate eba sabeu taan itatalu minca polak, kisedda te akupusuppa taam mugogolu Aku minca katubum samba taan Kuaseake ekeu minca.

¹⁰ Kalulut kenanen ipaotcak sangamberi leleu samba ipangeungeu sangamberi tinambu, tapoi nuntut bagakKu ta tuotca katubum samba pelelengan abanKu ta ipangengeungeu, tiboiet Tuhan, sipununtuki ekeu baga.

¹¹ Ale ekeu situoorei, siorak rusa talabari, sitaipususuibiet! Bulatnia te, Kugalakake le geti aponu sibara ka bukku simapusu samba sangamberi bongennu sibara ka bukkut simoite.

¹² Kugagalai te sangamberi iripnu sibara ka bukku simakirisau, sangamberi matatbaliu gugurukat sibara ka bukku manikam simabonan samba sangaliot irip pasongannu sibara ka bukku simakirisau.

¹³ Sangamberi tatogam ibailiu le sipasiului si Tuhan, samba makopenangan leu erut puririmanuanda;

¹⁴ turioake le ekeu geti ka uddut pubulanan. Tuareu le ekeu ka pasirauraugat, kalulut taan maloloto ekeu, samba tuareu le ekeu ka katugegekat, kalulut taan malelegrenia katubum.

¹⁵ Ke moi pasaggak sirimanua nenda ta sibara Kaku; kenanen kasei pa sisaggagngi ekeu, matei le nia isaggangi ekeu.

¹⁶ Bulatnia te, Aku le amasibaraake siagai mugalai laba sipasiulup obengan samba sibaraake pamatei siripot againia, tapoi Aku leu et amasibaraake pasisubu bule ipakatainia.

¹⁷ Senen pamatei sipaddai bule rasaggangi ekeu ta mamamanang sia, samba senen sirimanua siake pasuksungan kabagat pakaroat patoilanungan geti puseleatda. Nene te sibailiu rubeiatda sapagugulet Tuhan samba pubulanan sisilora katubukKu, kise te tiboiet Tuhan.