Jes. 53 - BUKO SIPUNENAN

¹ Kasei simatonem baga ka katuareman siarepmai, samba katubut kasei ipatoila gegeNia si Tuhan?

² Sibailiu sinula mutu'tu le nia ka matat Tuhan samba sibailiu sinula ka polak simagarak. Ta simalainge itcoiketta katubunia taanai simaala bagatta samba simakiddi kabagatta.

³ Tupaloloi le nia samba raareuake le tubutda sirimanua katubunia, sirimanua simasun pangoringan samba simatukkle masiorik besi'; bulat loloiet le nia, bailiu petpetranngan matatda sirimanua katubunia samba ka sita leu ta tapuletseinia.

⁴ Tapoi bulatnia te, besita le aibairat, samba pangoringanta le aiorik, tapoi takua aiorak le nia pateleiat, tubo'bo samba ipaoreijinia Taikamanua.

⁵ Tapoi tupunu le nia kalulut pukelakat patuatta, tubo'bo le nia kalulut jotta; ukuman sibaraake puraugatta tuorakake katubunia, samba kalulut logaunia bailiu maalettangan.

⁶ Sangamberitta simapape le kele biribiri, senesenenta muenung ka enunganta saratta, tapoi Tuhan masiorakake katubunia pukakataita sangamberitta.

⁷ Tubesiki le nia, tapoi iobaake le tubnia itupaoreiji samba ta ibuka ngungunia kele togat biribiri siabbit ka pasijajakat; kele inan biribiri sipukatci kamatat sirimanua sipasisapu bulunia, ta ibuka ngungunia.

⁸ Tupapatake le nia samba tupakaraoke, lepe tuabbit samba tuukumake simateiakenen. Taanai sipuletsei purimanuaiatnia; mateinia kalulut jotta.

⁹ Turateiake le nia pasamba sirimanua sikatai, rateinia katalagatda sirimanua simakayo, kenanen ta aigalaiake sikatai, samba ta apatajunia.

¹⁰ Tapoi iobaake le si Tuhan itubo'bo samba itubesikinia. Ke isegeake tubunia sibailiu buluakenen pasitebui jo, itconangan geti muntogatnia, ramaburu murimanua, samba obaket Tuhan mariuriu kalulut nia.

¹¹ Lepat pangoringan tubunia itconangan geti pato samba bailiu masegenangan bagania; samba paguguletKu nenda, sibailiu sirimanua simatopit, sineseatakenangan sirimanua simigi kalulut sikut patuatnia, samba pukakaira bairatnangannia.

¹² Kalulut nenda Kurubeiake le katubunia sangamberi sirimanua siabeu tiboi tubu sibailiu siraurau, samba silonangan geti sangamberi sirimanua simaron tubu sibailiu siraurau, iate sibailiu sili kalulut aisegeakean engania ka kamateiat, samba tuaddeake le nia sirimanua simakela patuat, kenanen ibairat jotda sirimanua simigi samba itiddouake sangamberi simakela patuat.