Jes. 52 - BUKO SIPUNENAN

Tuhan masiarauake Sion

¹ Suruake kam, suruake kam! Pakei kam rnmui kele nupakei kam leppeimui, ale Sion! Pakei kam leppei puaabeumui, ale Jerusalem, laggai sipunenan! Kalulut taanai berisara sirimanua sitaipususunat ele kasitsitakenen situguguru minca katubum.

² Soksokake abu katubum, suruake ekeu, ale Jerusalem situtatangsi! Golok kam sangamberi appra ka lolokkatmui, ale okko Sion situtatangsi!

³ Kalulut kise te tiboiet Tuhan: Tusakiake le kam sitasaki, oto tutebui le kam geti sitasaki leu et.

⁴ Kalulut kise te tiboiet Tuhan Taikamanua: Siburu paamianKu mei ka Misir bule rakuddu sedda sibailiu siooiake, lepa rauraunangan sia Asyur sitapaluluat.

⁵ Tapoi kineneiget, apangan le Kugagalai sene? Kise te tiboiet Tuhan. PaamianKu tenan le sia raurau. Sipasikupkup sia rabuakake le patuatda, kise te tiboiet Tuhan, samba oningKu mariuriu le tuloloi sanganantat gogoi.

⁶ Kalulut nenda paamianKu raagai le geti oningKu samba kateteret nenda agairangannia, Aku le amanibo, bulatnia Aku le!

⁷ Apate lainge tuitconia sibara ka uddut leleu kaoijanan sipasiabbit katureman, sipaagaiake katuareman paabanan! samba sipakakra katuareman simeru, sipaagaiake katuareman puaraugat samba masikua katubut Sion: “Taikamanuam nenda iate Rimata!”

⁸ Arepake nganganda sirimanua sijago ekeu; muangka baga le sia simakere. Kalulut sia poi masiiitco kipa itoili si Tuhan ka Sion.

⁹ Puangka kam baga, pugora kam baga simakere, ale karagatat Jerusalem! Kalulut aipusuibingan paamianNia si Tuhan, aitebuian Jerusalem.

¹⁰ Aipatoilaan si Tuhan kabeiNia sipunenan kamatatda sangamberi bangsa; oto itcorangannia sangamberi tai kapolak puaraugat sibara ka Taikamanuanta.

¹¹ Areuake ekeu, areuake ekeu! Belaake kam sedda! Bui' iorak ekeu kasitsitakenen! Belaake ekeu katalagatda, linaake tubum, ale sangamberi sirimanua siakkatake bibilet uman Tuhan!

¹² Bulatnia, ta te bebela kam simaola samba ta mubabalau kam, kalulut muenung le si Tuhan kamatamui, samba Taikamanuan Israel ibailiu le geti pangampulat ka mungkuatmui.

Pagugulet Tuhan sipangongorik

¹³ Bulatnia te, mauktuk te paguguletKu, tuabeuake, tuumun samba tuumunake.

¹⁴ Kele ramakisei kabaga sirimanua simigi raitconia bulat makatai tubunia, taan kele sirimanua, samba ituitco taan kele sirimanua.

¹⁵ Kisedda igalai imakisei kabagatda sangamberi sirimanua, mumengmeng tai rimata raitconia, kalulut raitco le geti aponia sipumumuanakenen katubutda, samba aponia sitaiaremenda agairangan leu et nia.