Jes. 51 - BUKO SIPUNENAN

Tiboiet pusuibiat katubut Sion

¹ Arepake kam Aku, ale kam sikukru pubulanan, ale kam sipasigaba si Tuhan! Mattai kam leleu bulak sibara onimui sipaek, samba ka lobok bukku sigaigai kudduat aitugaigai kam.

² Mattai kam si Abraham, taikebbukatmui, samba si Sara situ'tuake matamui; kateteret aipusara si Abraham, sogaikungannia, lepa sukatakekungannia samba kaukungan reddenannia simigi.

³ Kalulut Tuhan masipusuibi Sion, masipusuibi sangamberi karagatatnia; igalai le polak simalio kele mone Eden samba bakkat loina kele monen Tuhan. Sedda ai gorat baga samba angkat baga, urai pusurakat samba urai sabeu.

⁴ Lelekake kam tiboietKu, ale sangamberi bangsa, samba tongiake kam piumui katubukKu, ale sangamberi suku bangsa! Kalulut bela le geti nganturat kaku samba surukatKu sibailiu pato ka sangamberi bangsa.

⁵ Kabagat sangapeipeikat mata malegre le geti puaraugatKu, kabelaiat akenenKu momoian le, samba kabagat geget kabeiKu koniakekungan sangamberi bangsa; KatubukKu le rapasingengena sangamberi tobbou laggai, samba sigalai kabeiKu le rakakaroni.

⁶ Ipoake kam matamui ka manua samba itco kam ka polak ka tei; kalulut tata le manua kele kujuk, polak makamung kele leppei simamumumu' samba matei le geti silaggaijinia kele legu; tapoi kabelaiat akenenKu mariuriu le geti teret burburu, samba puaraugat sibara kaku ta tatata.

⁷ Arepake kam Aku, ale kam siagai aponia simaeru, ale bangsa sikoiriake nganturatKu kabagat patuatmui! Bui' numaloto kam ke rapakaila kam sirimanua samba bui' nutuge'ge kam ke rapaloloi kam.

⁸ Kalulut ikom le sia geti tabubulut kele ikom leppei samba ikom le sia geti tabubulut kele ikom komak sibara ka bulut biribiri; tapoi puaraugat sibara kaku mariuriu le geti teret buruburu samba kabelaiat akenenKu mariuriu le ka sangamberi reddenan.

⁹ Suruake kam, suruake kam! Pakei kam puroron, ale kabei Tuhan! Tusuru kam kele kateteret siburu, katetere reddenan ka siburu peile! Ta pa Ekeu le amasipakatai Rahab, sipunu naga pat matei?

¹⁰ Ta pa Ekeu le amasigarakake koat, oinan simalio simakeru? sigalai koat simakeru ibailiunia enungan, bule ioi raputalipo sangamberi sirimanua siarauakenen?

¹¹ Oto toili le geti sangamberi sirimanua sibelaakenen Tuhan samba tuguru ka Sion kabagat gorat baga, samba angkat baga sitaimasususu masilakkup sia. Muangka baga le sia samba mugora baga, asapprungan reureu baga samba pangoringan.

¹² Aku te, Aku te sipusuibi kam. Kasei pa ekeu bailiu maloto ekeu ka sirimanua simasusuet, ka sirimanua siribbaiakenen kele turuturu

¹³ bailiu kalipoginungan Tuhan sibaraake ekeu, singanangake manua samba sigalakake bongen polak, bailiu mariuriunangan numaloto ka sanganantat gogoi ka oloi golura sirimanua sipaorei, ke matarekngan sia rapasisubuake? Kaipania oloi golut sirimanua sipaorei nenda?

¹⁴ Nia situappra tubelaake le geti simaruei; ta tugogorosotnia geti ka ngaliu ratei, samba ta magugulai komen,

¹⁵ kalulut Aku te Tuhan, Taikamanuam, sipasigogotco bagat koat, bailiu purounangan lektuk onu Tuhan Sebaot oniNia.

¹⁶ Kukau le tiboietKu ka ngungum samba tukoiriake ekeu kabagat pasikelat kabeiKu, bule Kutoili masinga'ngaake manua samba masigalakake bongen polak, samba masikua ka Sion: Ekeu te paamianKu!

¹⁷ Suruake ekeu, suruake ekeu, suruake ekeu, ale Jerusalem, ale ekeu sipulolo sibara ka kabei Tuhan sibara kabagat pulokat oloi goluNia, ekeu silo, sipotpot itata sibara kabagat pulokat simapuinengen!

¹⁸ Sangamberi tatoga situ'tuakenenia mata taanai sipalulunia samba sangamberi tatoga siuraunia taanai siukkaake kabeinia.

¹⁹ Ka rua pagalaiat nene aiorakngan ekeu – kasei situtake reureu bagam? Katusubuat samba karagatat, pulajeat samba lanjau – kasei masipususuibi ekeu?

²⁰ Sangamberi tatogam amugailaan sia kalulut saggo ka sangamberi tu'tut enungan kele simatsura ialania sesere; iorak le sia golut Tuhan samba paasekat Taikamanuam.

²¹ Kalulut nenda, arepake nene, ale ekeu situorei, ale ekeu simapuineng, tapoi ta kalulut anggur!

²² Kise te tiboiet Tuhannu, Tuhan, Taikamanuam le amasipasikeli pakarot paamianNia: “Bulatnia te, Kuala le sibara ka kabeinu pulokat samba sibabara kabagania simapuinengen, samba kabagat pulokat goluKu taan nulolo minca.

²³ Tapoi Kukau le geti ka kabeira sirimanua sipaoreiji ekeu, sipasikua siboiki katubum: Lukkukake ekeu, bule tusabau kai kupaperaki kai ekeu! Oto apoakenungan teiteinu kele gaktuk polak samba kele enunganda sirimanua situsasabau.”