Jes. 5 - BUKO SIPUNENAN

Urai pagalaiat monen anggur

¹ Kuuraiake te urai pagalaiat simanuntu bagakku, urai simanuntu bagakku pagalaiat monen anggurnia: Simanuntu bagakku nenda ai monen anggurnia ka gilak tinambu simagabru.

² Pakkrunangan polaknia samba ribbaiakenangan pabukku-bukku, samba urepnangan anggur simaeru galainangan kudduat pujagoat simabuak ka talagania samba gaigainangan uggungan kudduat pasipionan anggur; lepa ngenanangannia bule mone nenda ibaraake buat anggur simaeru, tapoi aibaraake geti iate buat anggur simalaga.

³ Oto kineneiget, ale sipulaggai ka Jerusalem, samba tai Jehuda, pakaroake kam Aku pasamba monen anggurKu.

⁴ Apangan le tugagalaiake ka monen anggurKu nenda, sitapei Akugalaiake katubunia? Kungenaake bule ibaraake buat anggur simaeru, angoi bua simalaga le aibaraake?

⁵ Oto kineneiget, Kupaagainia katubumui apa lepa geti Kugagalaiake ka monen anggurKu nenda: Kutadde le geti kekrenia simarui, bailiu mone nenda pakatainangannia tarimeu simasabbak, samba bukkatakenangan iripnia, bailiu mone nenda paperakinangannia.

⁶ Obaakekungan geti ipututu parou, ta tupalilina loinania, bailiu putu'tunangan turuturu samba bekbek kurut; koiniakekungan geti tanai rusa, bule ta bele urat ka mone nenda.

⁷ Kalulut monen anggur Tuhan Sebaot, iate paamian Israel, samba tai Jehuda iate siureman kilibet bagaNia; ngenaakenangan katuroipoat, tapoi sarat sikatai le abara, ngenaakenanan pubulanan, tapoi sarat pukakatai le abara.

Paasekat pagalaiat senengamata pukakatai

⁸ Matei le sia sipasiraurau senen lalep samba sipasiala senen mone, bailiu taibaranangan kudduatda sabagei samba ekeuan le saram mukuddu kabagat laggai!

⁹ Maarepnangan ka piuku tiboiet Tuhan Sebaot: “Bulatnia te, maigi te lalep ibailiu simatangeu; sangamberi lalep sabeu samba simalainge ta babara geti sikudduijinia.

¹⁰ Kalulut monen anggur lionia pulu ngagogoi itukuilu sarat pulu ngaliter le suania babara; samba sangotu ngaliter uremen, sarat pulu ngaliter gandum le babara.”

¹¹ Matei le sia sitususuru simansep samba simariuriu masigaba lo simapuinengen, samba sipukuddu pat aili sinoibo, maoloi le tubunia kalulut anggur!

¹² Kecapi, gambus, rebana samba suling, samba leu anggur ai kabagat punenda, tapoi sigalai Tuhan ta aisuru samba galajet Tuhan ta ailelekake.

¹³ Kalulut nenda paamianKu buita tuambit ka kudduat katuribbaiat, kalulut ta raagai aponia pa; mate le geti sangamberi saute kalulut laje, samba raorik le oggou sangamberi sirimanua.

¹⁴ Totolou lolokkat laggaira simamatei tunga'nga simalio samba ngungunnia ibaktakake simalio sitatetere, bailiu sappru kabagania sangamberi pulaingean samba pulatsanan Jerusalem, sangamberi pugaugaupat samba sangamberi sirimanua sipuangka baga ka laggai nenda leu sappru.

¹⁵ Oto sirimanua tupakaila le geti, samba sirimanua tuepeake geti, bulatnia, sangamberi sirimanua simabuak patuat tuepeake.

¹⁶ Tapoi Tuhan Sipulugege masipakoinong puaabeuNia kabagat masigalaiake puroipoatNia, samba Taikamanua Sipunenan masipakoinong pusisipunenanNia kabagat pubulananNia.

¹⁷ Iageti biribiri mukom le geti parou ka kudduat nenda samba kambing igaba le geti kannia kabagat lalepda simakayo simabubukkat.

¹⁸ Matei le sia sioba masibaraake puseleat ka enungan patajuat samba sioba masibaraake jo kele paningtik gerobak.

¹⁹ Kuarangan: “Eddangan igalaiake Taikamanua simaruei galaiakenenNia, bule taitconia; samba eddangan siteuakenen Sipulubunan, Taikamanuan Israel, ioi imalegre, bule taagainia.”

²⁰ Matei le sia sipasisikua sikatai nenda maeru samba simaeru nenda sikatai, sipasisili pugepgeman bailiu pupatokat samba pupatokat bailiu pugepgeman, sipasisili simapongit bailiu simananam, samba simanam bailiu simapaongit!

²¹ Matei le sia sikau tubunia simasiku patuat, samba sikau tubunia simaagai!

²² Matei le sia simaron mulo anggur samba simamanang kabagat masipagalu lo simapuinengen;

²³ sineseatake sirimanua sikatai kalulut pasisilo bulagat patajuat, samba masiputata pubabakkatda sirimanua simatopit.

²⁴ Kalulut nenda kele jalai obengan ilabo siperakat samba makere le parou simagarak sappru ilabonia obengan, kisedda leu et sangambei ungatda imabutek, samba sibotconia tuburut kele abu, kalulut ta raoba masisilo nganturat Tuhan Sipulugege samba masipatelei tiboiet Sipulubeunan, Taikamanuan Israel.

Bangsa bagei sibailiu paneiteiat golut Tuhan

²⁵ Kalulut nenda pugolunangan si Tuhan ka paamianNia, totoiakenangan kabeiNia katubutda samba bobonangan sia; pugeretnangan sangamberi leleu, samba tubutda simamatei kele siribaiat sirimanua katalagat enungan. Kenanen muaili sangamberinia nene, goluNia ta ibebeleki samba kabeiNia aipeile tutototoi.

²⁶ Pagiloknangan geti toggaiat ka bangsa sikuddu ka sareunan, samba pupuilunangan masisogai sia ka tu'tut polak; bulatnia te, moi le sia simaruei, bulat simaola!

²⁷ Taanai simasaggo samba taanai situsosoksok katalagatda; ta mauneng samba ta amarep sia ta aigolok akkik tenganda samba apprat tarangainia ta atakki.

²⁸ Sot siloguinia tulauruake samba sangamberi rourounia tuparoipo; kelat sulet kuronia kele bukkut obengan samba guguilut keretania kele kasoubaliok.

²⁹ Rounia kele singa sinanalep, murou sia kele singa sibau tubu; murou le sia samba masitarakup saggaknia, ambitrangannia samba berisara sioi masibelaakenia.

³⁰ Kateteret gogoi nenda kuneminangan sia sara nganga kele ipugok koat Ke rakinere ka polak, sibulatnia, ai gepgep simaokkip, samba pato ibailiu gepgep kalulut tanai rusa.