Jes. 49 - BUKO SIPUNENAN

TIPPU 49–55 PAGUGULET Tuhan Pagugulet sibailiu pato katalagat sangamberi bangsa

¹ Arepmake kam aku, ale sangamberi tobbou laggai, lelekake kam, ale sangamberi bangsa simareunan! Aisogaian aku si Tuhan barania peile ka suruket aikuangan oningku kateteret aiaku ka suruket inangku.

² Aigalaian ngungungku kele lanjau simalauru samba masigalai aku kupukunem ka pasikelat kabeiNia. Aigalaian aku kele silogui simapiat samba ikoiriake aku ka salukat siloguinia.

³ Kuanangan katubukKu, “Ekeu iate paguguletKu, Israel, samba kalulut ekeu, Kupatoila le geti pulatsananKu.”

⁴ Tapoi kuakungannia, “Amabesian tubukku siboboi samba kutataake ronku siboboi samba sitapaluluat; tapoi, ikepakenenku ai katubut Tuhan samba upakku ka Taikamanungku.”

⁵ Oto kineneiget, tiboiet Tuhan, sipasigalai aku barania peile ka suruket, bule ibailiu paguguletNia bule masitoiliake si Jakob katubuNia, samba bule itururuake Israel katubuNia, oto abeuakenangan aku ka matat Tuhan samba Taikamanuangku ibailiu ronku, nganganNia.

⁶ “Makopean le tata kekeu, sibailiu paguguletKu, iate masironake sangamberi muntogat Jakob samba masitoiliake sangamberi tai Israel siturerere tupasikeli. Tapoi Kugalaiake le ekeu geti ibailiu pato ka sangamberi bangsa bule puaraugat sibara katubukKu iaili ka tu'tut polak.”

⁷ Kise te tiboiet Tuhan, Sitebui Israel, Taikamanuania bulat Sipululatsat, katubunia rakau paloloiat sirimanua, katubunia ramasitsit sangamberi bangsa, katubut paguguletda sibara gege: “Raitco le geti sigalaiKu tai rimata, lepa suru sia masitabi Aku, samba sangamberi siabeu tiboi tubu murekkuk le geti katubukKu kalulut Tuhan simariuriu topit kalulut Sipululatsat, Taikamanuan Israel, sipili ekeu.”

Sion tupaeru

⁸ Kise te tiboiet Tuhan: “Kateteret ioba bagakKu, alegikungan ekeu, ka gogoi Kupasiarauake, ropakekungan ekeu; Akugalaian samba Kuake katubum, ibailiu palelengan ka sirimanua, bule tugalai minca polak samba masiparubei polak muntogat simatangeu nene,

⁹ masikua ka sangamberi sirimanua situpapatpat: Belaake kam! Ka sirimanua sikuddu ka gepgep: Konan kam! Ka sanganantat enungan kele biribiri le sia sitaimagulai turuturu, samba sangamberi leleu simatulai leu ai turuturu ka sia.

¹⁰ Ta malalaje ele ta maonggou sia; rusa simaoloi samba oloi sulu ta iorak sia, kalulut Sipununtuki sia baga ipaalei le sia samba ipalulu le sia geti ka bebet bubuakat oinan.

¹¹ Kugalai le geti sangamberi leleuKu ibailiunia enungan samba Kugaktukake le geti sangamberi enunganKu sabeu.

¹² Itco, ai sirimanua soi sibara ka sareunan, ai sibara ka bare samba sibara ka kabelaiat sulu, samba ai sibara ka laggai Sinim.”

¹³ Pugora kam baga, ale manua, pugora kam baga, ale polak, samba puangkabaga samba pugora baga, ale sangamberi leleu kalulut Tuhan masipusuibi paamianNia samba aipununtukingan baga sia sapaamianNia sipinaoree.

¹⁴ Sion masikua, “Aikaddiuakean aku si Tuhan samba aikalipogingan aku Tuhanku.

¹⁵ Momoi pa sara sinanalep masikalipogi togania sigoiso, bailiu taipununtukinangan baga toga sibara ka suruketnia? Kenanen ikalipoginia, ta Kukakalipogi ekeu.

¹⁶ Itco, Akutularaningan ekeu ka takepKu sangamberi irip laggainu mariuriu le ka matakKu.

¹⁷ Sangamberi sirimanua sigalai ekeu moi le sia simaruei, tapoi sangamberi sirimanua siragat samba supakatai ekeu rakaddiuake le ekeu.

¹⁸ Akkatake utenu samba itco ka sangalionia, sangamberitda paruru moi ka tubum. Kalulut Aku sipuririmanua, kise te tiboiet Tuhan, bulatnia, sangamberitda nupakei le sia sibailiu pulaingean, samba nubolitake le sia geti, kele sigalaiakenen talimouakenen sinanalep.

¹⁹ Kalulut sangamberi kudduatnu simagarak samba simatangeu samba laggainu simararagat, bulatnia, kineneiget makope okkip rakudduijinia sirimanua simigi samba sangamberi sirimanua sioba sikoilok ekeu raareuake le tubutda.

²⁰ Beringan, tatogam siaddeakenennu simapepepe rakua le geti katubum: “Kudduat nenda bulat maokkip kaku, oggakake, bule ioi kukuddu sedda!”

²¹ Oto kuanungan geti kapatuatnu: “Kasei amasitu'tuake matatda tatoga nene kaku? Ta pa makatai samba taanai tuppai tubukku, tuabbit ka kudduat katuribbaiat samba tuareuake? Tapoi tatoga nene, kasei amasiurau sia? Bulatnia te, sarakkungan le amulegei, tapi sia nene, kaipa arabara?”

²² Kise te tiboiet Tuhan, Taikamanua: Itco, Kuakkatake te kabeiKu sibailiu toggaiatda sangamberi bangsa samba masikau toggaiatKu ka sangamberi suku bangsa, oto rabeila le geti tatogam taimanteu samba tatogam tainanalep raabbait siore.

²³ Oto sangamberi tai rimata ibailiu le geti sipasikeli ekeu samba sinanalepda tai rimata ibailiu le geti sipasijago ekeu murekkuk le sia geti katubum pat aili ka polak ute'ra samba bolotrangan geti abut rerem. Oto againungannia geti, Aku te Tuhan, samba sangamberi sirimanua singenaake Aku ta rasisilo puailaat.”

²⁴ Momoi pa tuoppu minca siraurau ka simagege ele momoi pa rabela situtatangsi kabeira simagege?

²⁵ Bulatnia, kise te tiboiet Tuhan: “Sitangsiakenenda simagege leu momoi tuoppu minca, samba sirauraura simagege momoi rabela minca, Kalulut Aku le geti masisasaggangi sirimanua sisaggangi ekeu samba Aku le geti masiarauake tatogam.

²⁶ Kuubbuake le geti sangamberi sirimanua sipaorei ekeu rakom akkula'ra, samba mapuineng le sia geti kalulut ralo logaura, kele sirimanua simapuineng kalulut ralo anggur sibau, bule raagainia sangamberi sirimanua, Aku, Tuhan, iate Sipaarau ekeu samba Sitebui ekeu, Simakope ron, Taikamanuan Jakob.”