Jes. 47 - BUKO SIPUNENAN

Katukataikat Babel

¹ Gorosotake samba kudduake kam ka uddut abu, ale toga okko, okkot Babel! Kudduake kam ka polak sita kudduat purimataat, ale okkot Kasdim! Kalulut taan rakukua ekeu minca simalainge tubu samba simaumun.

² Ala bukku pasigulunan samba gulutnungan tapung, bukaake tabut ute'nu; karaiake komaknu, bukaake bakkapatnu, talipokingan sangamberi bagat oinan!

³ Eddangan imatoila pukailaatnu samba imatoila puailaatnu Kubabaraake te geti pasilumunan, samba berisara tupununtuki baga,

⁴ ngangan Sipanebu kai, Tuhan Sebaot oniNia, Sipululatsat, Taikamanuan Israel.

⁵ Kuddungan samba mutangoan samba leu guruake ekeu kabagat gepgep, ale okkot Kasdim! kalulut taan rakukua ekeu minca rimata sinanalep ka sangamberi purimataat.

⁶ Siburu mugolu le Aku ka sapaamianKu, Kupalolit bakkatKu, samba masiake sia ka kabeinu; tapoi ta anupuntuki sia baga, tapoi anukau le bairanen simakope sane ka simabaja.

⁷ Siboiki ekeu masikua: “Teret buruburu mariuriu le ibaiiu aku rimata sinanalep!” beringan ekeu ta anuagai samba ta anupaatu kalepakat sangamberinia nenda.

⁸ Kalulut nenda, arepake nene, ale sirimanua sipurimanua kabagat sulet tubu, sipukukuddu kabagat arau, sipasikua ka patuatnu: “Taanai sabagei kabebekku! Ta ibabailiu aku silumang samba ta masusu aku!”

⁹ Karua pagalaiat nenda iorak le ekeu kabagat sangapeipeikat mata, ka gogoi nenda leu. Katusubuat samba pulumangan simasun iora le ekeu geti, kenanen maigi tawam samba bulat maron kereinu.

¹⁰ Siboiki maarau ekeu kabagat pukakatainu, kuanungannia, “Taanai sipasiitco aku!” Sikut patuat samba puaagainu nenda sipepeake ekeu, bailiu kuanungan ka patuatnu: “Taanai sabagei kabebekku!”

¹¹ Tapoi iorak le geti ekeu gejat baga, ta nuagai masipakei kereinu katubunia gejat baga iorak le ekeu, tamomoi nukeraakenia kabagat nupanguruatake buluakenen; katusubuat iorak le ekeu sinulut, sitaisuksungen bagam.

¹² Kauan numariuriu ka sangamberi kereinu samba tawam simigi nenda, sigejaake bagam barania ka sigoiso peile ekeu; buleu momoi nubaraake paroman, buleu momoi nubaraake pulotokat.

¹³ Amasaggongan ekeu kalulut iginia nganturat! Eddangan raoi samba raarauake ekeu sangamberi sirimanua silelekake sangamberi tu'tut manua, silelekake sangamberi panyanyat ka senen laggo sibau masipaagaiake aponia sipuaaili katubum!

¹⁴ Bulatnia te, kele legei siperakat le sia silabot obengan; tamomoi raarauake enganda ka geget julu obengan; obengan nenda ta bot pasioloi tubu, ta obengan purakaat!

¹⁵ Kisedda katukaunannia kekeu ka sikereinu nenda, sigejaake bagam barania ka sigoiso peile ekeu; senesenenda ipare're ka sangamberi kabaraiat, taanai sioi masiarauake ekeu.