Jes. 46 - BUKO SIPUNENAN

Sabulungan Babel tata ron tubu

¹ Bulungan Bel atukalaakean, bulungan Nebo aturappoakean, sangamberi tularatnia atukauan ka uddut tarimeu, sibairatmui simakere siboiki kabagat angkat baga, kineneiget atukauan sibailiu bairanen ka tarimeu simasaggo,

² sitaioi masiarauake bairanennia nenda. Sabulungan turappoake samba tukalaake simakere samba sia leu tuabbit sibailiu tangsiakenen.

³ Arepake kam Aku, ale muntogat Jakob, ale sangamberi sirimanua sipulelegei sibara ka muntogat Israel, ale sangamberi sirimanua sipasikelikKu barania peile ka suruket, ale sangamberi sirimanua abeuakenenKu barania peile ka kudduat suruket.

⁴ Pat baja kam Aku mariuriu Taikamanua samba pat bulau alaimui Kubeila le kam. Akugalaiakean samba Kuoba Kupasikeli ekeu simariuriu; Kuoba masibairat samba masiarauake kam.

⁵ Katubut kasei nupakereake kam Aku, samba nupasikatake kam Aku, bailiu makeremaian?

⁶ Sirimanua masibelaake mas sibara ka sakunia samba masikilo perak pasamba pasikilo sigoiso, raupa siagai mugalai mas bule ragalai taikamanua ka mas nenda, lepa buluijirangannia, samba leu panindogirangannia!

⁷ Akkatakerangannia ka ta'tara samba bairatrangannia, lepa kaurangannia ka kudduatnia, purionangan sedda samba ta mututuitui ka kudduatnia. Kenanen musoga sia katubunia, ta ialegi samba ta iarauake sia kabagat pangoringanda.

⁸ Repdep kam pagalaiat nenda samba kau numaila kam, paatu kam ka patuatmui, ale sangamberi sirimanua simakela patuat!

⁹ Repdep kam sangamberi pagalaiat barania ka siburupeile, Aku te Taikamanua samba taanai sabagei, Aku te Taikamanua taanai kele Aku,

¹⁰ sipaagaiake barania siboiki pagalaiat ka sibabara samba barania ka siburu peile sitai puaaili peile, sipasikua: SiteuakenenKu muaaili le geti, samba sangamberi siobat bagakKu Kugalaiake le geti,

¹¹ sisogai uma simasabbak sibara ka kabelaiat sulu samba sirimanua sigalaiake siteuakenenKu sibara ka laggai simareunan. Akukuangan, oto Kuoba kuririuriuakenia, Akuisiakean, oto Kugagalaiakean le.

¹² Arepake kam Aku ale sangamberi sirimanua simabuak patuat, sangamberi sirimanua simareunan ka pubulanan:

¹³ Puaraugat sibara Kaku taan mareunan, kalulut Akulegreakean samba kabelaiat akenenKu taan tuoreake; Kuake le geti kabelaiat ka Sion samba pulatsananKu katubut Israel.”