Jes. 45 - BUKO SIPUNENAN

Tuhan masipakei Koresh sibailiu pugalaiNia

¹ Kise te tiboiet Tuhan: “Nene te tiboietKu ka sirimanua sisukatakenenKu, katubut Koresh siukkaakenenKu kabeinia sikatoet bule Kukalaake sangamberi bangsa kamatania samba masibakbakake gegetda tai rimata, bule Kunga'ngaake sangamberi matatbaliu kamatania samba bule sangamberi matatbaliu gugurukat ta tupapatpat:

² Aku le muenung kamatam samba masigagaktukake paleleuleleu, masiraragatake sangamberi matatbaliu tembaga samba masibabakbakake lelekkre laba.

³ Kuake te geti katubum pukayoat bibilet sitaimakokoinong samba pukayoat bibilet situkokoiri, bule nuagainia, Aku te Tuhan, Taikamanuan Israel, sipasisogai ekeu pasamba onim.

⁴ Kalulut paguguletKu si Jakob samba Israel, sipilikKu, oto sogaikungan ekeu pasamba onim, tuake le ekeu, kenanen ta nuagai Aku.

⁵ Aku te Tuhan samba taanai bagei; ke ta Aku taanai Taikamanua. Akuakean pamateinu, kenanen ta nuagai Aku,

⁶ bule raagainia sirimanua barania ka kabelaiat sulu pat aili kabelekatnia, taanai sabagei ke ta Aku. Aku te Tuhan samba taanai sabagei,

⁷ sibailiuake pato samba sibaraake gepgep, sibailiuake purimanuaiat simaeru samba sibaraake purimanuaiat sikatai; Aku te Tuhan sipasigalai sangamberinia nene.

⁸ Ale manua, baibaiake pei puroipoat sibara kapata, samba eddangan ipiliakenia tanai rusa! Eddangan inga'ngaake tubunia polak samba ipusinula puaraugat, samba eddangan itu'tuake puroipoat! Aku te Tuhan sibaraake sangamberinia nene.”

Tuhan iate sipasibaraake

⁹ Matei le sirimanua sipagoluake Sibaraakenia; makere le nia kele siragatat pario'! Ai pa polak ottot masikua ka sipasigalainia: “Aponia nugagalai?” Ele katubut sigalainia: Taanai kabeinu!”

¹⁰ Matei le sirimanua sipasikua ka ukkui; “Aponia anutu'tuake” samba ka inania; aponia anutu'tuake?

¹¹ Kise te tiboiet Tuhan, Sipululatsat, Taikamanua samba Sipasigalai Israel: Kam pa siake parerekat katubukKu pagalaiat tatogakKu, ele masiparentaake Aku, pagalaiat sigalai kabeiKu?

¹² Aku te amasibailiuake polak samba amasibaraake sirimanua ka uddutnia; kabeiKu te amasinganangake manua, samba Aku te amasiparentaake sangamberi saladdunia.

¹³ Aku te geti amastubbui Koresh bule igalaiake puaraugat, samba Kugagaktukake te sangamberi enungannia; nia te geti masigagalai laggaiKu samba sibelaake geti paamianKu ka kudduat katuribbaiat, sita saki samba sita sili.” Tiboiet Tuhan Sebaot.

¹⁴ Kise te tiboiet Tuhan: Buat polak sibara ka Misir samba sangamberi uktuk sibara ka Etiopia samba tai Syeba, sangamberi sirimanua simananta tubu, moi le geti katubum samba bailiu bakkatnu, muenung le geti sia kateiteinu situpapalenggui; murappo le sia katubum samba masina'na ekeu, rakua: Bulatnia sarat katalagamui le ai Taikamanua samba taanai sabagei; taanai Taikamanua bagei kabebenia!

¹⁵ Bulatnia, Ekeu Taikamanua silipputake tubu, Taikamanuan Israel, Sipaarau.

¹⁶ Tapoi sangamberi sipasigalai tularat bulungan buita tusoksok ka sut puailaat samba iorak leu sia paloloiat.

¹⁷ Tapoi tai Israel iarauake le sia si Tuhan kabagat puaraugat teret buruburu; ta tupakaila samba tupalololoi kam teret buruburu.

¹⁸ Kalulut kise te tiboiet Tuhan, sibaraake manua, Nia te Taikamanua amasigalai samba amasibailiuake polak samba amasirioake polak samba aigalainia ta bule ta ibara kabagania, tapoi aigalainia bule itukudduiji, “Aku te Tuhan samba taanai sabagei.

¹⁹ Tapei amanibo Aku simalipput ele ka kudduat ka polak simagepgep. Tapei Akukoiniake muntogat Jakob ragaba Aku siboboi! Aku, Tuhan, masikua sineseat, simariuriu masikua aponia simaroipo.”

Pananakat ka sangamberi bangsa bule toili katubut Tuhan

²⁰ Paruru kam samba konan kam, patoila ka tubumui simakere, ale kam sangamberimui sibebela katalagat sangamberi bangsa! Taanai simaagai sangamberi sirimanua sipasiabbit tularat sigalai sibara loina samba sipanindou ka taikamanua sitaoi masiarauake.

²¹ Paagaiake samba kua kam paluluatnu, kauan, eddangan rapatibo sambatda: Kasei pa amasipaarep pagalaiat nene barania ka panandaatnia peile, samba amasipaagaiake barania peile ka siburu? Ta pa Aku, Tuhan? Taanai sabagei, taanai Taikamanua ke ta sibara Kaku! Taikamanua simaroipo samba Sipaarau, taanai sabagei ke ta Aku!

²² Toiliake kam katubukKu samba eddangan ituarauake kam, ale sangamberi tu'tut polak! Kalulut Aku te Taikamanua samba taanai sabagei.

²³ Kalulut Aku sarakKu, amusuppangan Aku, sibara ka ngungungKu abelangan pubulanan, sara tiboiet sitaioi tutiktik minca: samba sangamberi sirimanua murekkuk le geti kamatakKu, samba mupalelengan muriuriu topit kabagat senengamata nganga,

²⁴ sialei masikua: Puroipoat samba puroron sarat ka kabei Tuhan le. Sangamberi sibara golu katubuNia moi le geti katubuNia samba silorangan puailaat,

²⁵ tapoi sangamberi muntogat Israel makoinong le geti bulat sineseat le sia samba muangka baga kabagat Tuhan.”