Jes. 44 - BUKO SIPUNENAN

Tuhan sarania le Taikamanua

¹ “Tapoi kineneiget, arepake, ale Jakob, paguguletKu, samba ale Israel, sipilikKu!

² Kise te tiboiet Tuhan sibaraake ekeu, sigalai ekeu barania peile ka suruket samba siropake ekeu: Buian numaloto, ale paguguletKu Jakob, samba ale Jesyurun, sipilikKu!

³ Kalulut Kuuruake te geti oinan ka uddut polak simaonggou, samba urat simatirit ka uddut kudduat simagarak. Kuuruake te KetsatKu ka muntogatnu, samba panukanan ka sapunuteteunu.

⁴ Muurau le geti sia kele turuturu ka tengan oinan, kele loina balina ka bebet bagat oinan.

⁵ Sara masikua: Aku bakkat Tuhan, sabagei masikua geti tubunia ka onin Jakob, samba sikatelu isuratake le geti ka kabeinia: Bakkat Tuhan, samba oniakenangan tubunia geti oni Israel.”

⁶ Kise te tiboiet Tuhan, Rimata samba Sipanebui Israel, Tuhan Sebaot: “Aku te siboiki samba Aku te sikateitei; taanai Taikamanua sarat Aku le.

⁷ Kasei pa kele Aku? Eddangan isogaakenia, eddangan ipaagaiakenia samba inganangakenia katubukKu! Kasei amasipakakra barania siburu pagalaiat ka sibabara? Aponia siooi, eddangan rapaagainia katubumai!

⁸ Bui' mugeret tubumui samba numaloto kam, kalulut kirenangan barania siburu peile Akusegeakean samba Akupaagaian pagalaiat nenda katubumui. Kam te simunengake Aku! Ai leu pa Taikamanua bagei ke ta Aku? Taanai Leleu Bukku bagei, taanai siagaiKu!”

Taiagai patuat masibuluiji tularat

⁹ Sangamberi sirimanua sigalai tularat, sangamberinia siboboi le, samba sangamberi bibilet kilibet bagatda nenda taanai katukaunannia. Sangamberi sibuluiji tularat nenda ta raitco mata samba ta raagai aponia pa; kalulut nenda rasilo le puailaat.

¹⁰ Kasei amasigalai taikamanua samba tularat sigalai sitaanai katukolobat?

¹¹ Bulatnia te, sangamberi sipasitutnia rasilo le geti puailaat, samba sigalainia iate sirimanua le. Eddangan raparuru samba rapurio! Mugeret le tubutda samba rasilo aila simakere.

¹² Siagai mugalai laba' masigalai kabagat bot obengan samba paddainangannia panondoi, galainangannia kabagat ron kabeinia. Ainia mugalai iorik le laje bailiu tata ron tubunia, samba ta mulonia bailiu masaggonangan.

¹³ Siagai mugalai loina masinganangake appra pasikire samba masigalai sara tularat pasamba panurat simabonan; galainangannia pasamba papae samba jangka. Lepa kaunangan sara kele putubuat simanteu katubunia, kele sara sirimanua simalainge tubu, iageti galakakenangannia ka bagat uma sabulungan.

¹⁴ Ele taddenangan loina pinilok ele pilinangan loina saru ele loina tarbantin, lepa obaakenangan ipuurau loina katuka ka kabakkat loina, ele iurep loina ragget, lepa mabeunangan kalulut urat.

¹⁵ Loina nenda ibailiu loina obenganda sirimanua, rapakeinia masioloiake tubu; samba obekakenangannia bule irarak roti. Tapoi galainangan leu nia ibailiu taikamanua, lepa panindounangan katubunia; galainangannia bailiu tularat lepa buluijinangannia.

¹⁶ Iletalaga loina nenda labonangannia ka obengan samba ka uddutnia raraknangan akkula. Lepa komanangan akkula sirarak nenda pat ekteknia; lepa purakanangan sialei masikua: “Amaoloian tubukku, aiagaian tubukku oloi obengan.”

¹⁷ Legei loina nenda galainangannia ibailiu taikamanua, ibailiu tularat panindogietnia; buluijinangannia, murekkuk samba panindounangan katubunia, kuanangan: “Ropake aku, kalulut ekeu le taikamanuangku!”

¹⁸ Sirimanua kele nenda ta iagai aponia pa, samba ta iagai kolou, kalulut matania mapeset, bailiu tamomoi ipasiitco, samba patuatnia leu aile tupapatpat, bailiu ta iagai kolou.

¹⁹ Taanai sipaatunia, magulai puaagainia samba puaagai kolou ipasikua, “Iletalagania akulaboan ka obengan samba ka uddut bonia akurarakngan roti, akurarakngan akkula, lepa komkungannia, mateu pa legeinia kugalai ibailiu sabulungan kasitsitakenen” Mateu pa kupanindou katubut loina simagarak?”

²⁰ Sirimanua simagejabaga ka abu siboboi, ipataju le nia patuatnia, tamomoi iarauake tubunia ele masikua, ta pa boko le sibailiu ukkaakenenku?

Tuhan sipanebui Israel

²¹ Repdep le sangamberinia nene, ale Jakob, kalulut ekeu te paguguletKu, ale Israel. Akugalaian ekeu, ekeu iate paguuletKu; ale Israel, ta Kukakalipogi ekeu.

²² Akuposangan sangamberi jom pukelakat patuatnu kele kujuk iburutakenia rusa samba sangamberi jom kele tanai rusa siboroiakenen. Toiliake ekeu katubukKu, kalulut Akutebuian ekeu!

²³ Pugora kam baga, ale manua, kalulut amugalaian si Tuhan, pugora kam baga, ale bagat polak! Puangka kam baga, ale paleleuleleu, ale bakkat loina samba leu loina sikuddu kabagania! Kalulut Tuhan aitebuian si Jakob, samba aipatoilaan pulatsananNia ka pagalaiat Israel.

²⁴ Kise te tiboiet Tuhan, Sipanebui ekeu, sigalai ekeu barania peile ka suruket; “Aku le Tuhan, sibaraake sangamberinia, singanangake manua sarania, siapoake polak – kasei amasiaaleiake Aku? –

²⁵ Aku te amasitataake toggaiatda sipasituptup simaboko samba amasipaguileake sangamberi sipukekerei; amasigalai sangamberi sirimanua simasiku patuat tusoksok kateitei, samba amasibailokake puaagaira bailiu taiagai patuat;

²⁶ Aku te amasironake tiboietda sapaguguletKu samba amasigalaiake sangamberi siteuakenen sipakakratda sapakoinietKu; sipasikua pagalaiat Jerusalem: Eddangan itukudduijinia! samba pagalaiat sangamberi laggai Jehuda: Eddangan itugalainia, Kuoba masigalai minca karagatatnia!

²⁷ Aku te amasikua ka saisai bagat koat: Garakake ekeu, Kuoba masigarakake sangamberi bagat oinannu!

²⁸ Aku te amasikua pagalaiat Koresh: Nia paguguletKu; sangamberi obaketKu isutake le geti samba ikua pagalaiat Jerusalem: Eddangan itugalainia! Samba pagalaiat Uman Sipunenan: Eddangan tugalakake bongennia!”