Jes. 43 - BUKO SIPUNENAN

Taikamanua sarania le sipanebui

¹ Tapoi kineneiget, kise te tiboiet Tuhan sibaraake ekeu, ale Jakob, sigalai ekeu, ale Israel “Bui' numaloto, kalulut Akutebuian ekeu, Akusogaian ekeu iate onim, ekeu nene bakkatKu.

² Ke nulipoki ekeu ka oinan, Kupaalei le geti ekeu, ele ka kabagat oinan, ta mararaggai ekeu; ke muenung ekeu ka obengan, ta mararagget ekeu, samba julu obengan ta ilalabo ekeu.

³ Kalulut Aku le Tuhan, Taikamanuam, Sipululatsat, Taikamanuan Israel, Sipaarau ekeu. Misir akubailiuakean silim Etiopia samba Syeba leu sibailiu silim.

⁴ Kalulut ekeu makeppu saki kamatakKu samba malatsat samba leu manuntu bagakKu katubum, oto akekungan sirimanua sibailiu silim, samba sangamberi bangsa sibailiu silit engam.

⁵ Bui' numaloto, kalulut Kupaalei le ekeu, Kuake le geti sateteunu sibara ka kabelaiat sulu, samba Kururuake geti ekeu sibara ka kabelekat sulu.

⁶ Aku masikua geti katubut bare: Akean le! samba katubut kaiaman: Baan kekera! Abbit le tatogakKu taimanteu sibara ka sareunan, samba tatogakKu tainanalep sibara ka tu'tut polak,

⁷ sangamberi sirimanua sioniakenen kabagat oningKu sibaraakenenKu uktuk pulatsananKu, sigalaiKu samba leu sibailiuakenenKu!”

Israel sibailiu simunengake si Tuhan

⁸ Eddangan raabbit kamata bangsa simapeset kenanen ai matania, simatakkep kenanen ai piunia!

⁹ Eddangan raparuru simakere sangamberi bangsa, samba eddangan raparuru sangamberi suku bangsa! Kasei katalagatda sioi masipaagaiake sangamberi pagalaiat nene, sioi masipakakra katubutta sangamberi pagalaiat siburu? Eddangan raabbit sangamberi sipasimuneng ka sia, bule imatoila sineseat le sia; eddangan raarepnia sirimanua samba masikua: “Aisesengan kisedda!”

¹⁰ Kam nene te sipasimunenga Aku, Kise te tiboiet Tuhan samba paguguletKu sipilikKu, bule nuagai samba numatonem kam baga katubukKu samba masiagai, Aku mariuriu le Nia, Kepei Aku taanai Taikamanua atugalai, samba lepat Aku taan babara minca.

¹¹ Aku, Aku le Tuhan samba taanai sipaarau ke ta sibara Kaku.

¹² Aku te amasipaagaiake, masiarauake samba amasipakakra, samba ta taikamanua bagei sikuddu katalagamui. Kam te simunengake Aku, kise te tiboiet Tuhan samba Aku le Taikamanua.

¹³ Kisedda leu Aku mariuriu Nia, samba taanai sibela kabeiKu; Aku le masigalaiake, kasei sioi masikeraake?”

¹⁴ Kise te tiboiet Tuhan, Sipanebui ekeu, Sipululatsat, Taikamanuan Israel: “Kalulut ekeu obakungan Kukoiniake sirimanua ka Babel samba obakungan kunga'ngaake lelekkret matatbaliu tangsi, samba gereira tai Kasdim ibailiu le hoihoi.

¹⁵ Aku le Tuhan, Sipululatsat, Taikamanuam, Rimatam, sibaraake Israel.”

¹⁶ Kise te tiboiet Tuhan, sigalai enungan kabagat koat samba ka oinan sabeu,

¹⁷ sikoiniake kereta samba kuro bela pasaggak, kisedda leu et saladdu samba sirimanua simagege – mugaila le sia, tamomoi ratusuru, amateian, apean sibailiu kape –,

¹⁸ tiboietNia, “Buian nurepdep kam pagalaiat siburu, samba buian nulelekake kam pagalaiat barania peile ka siburu!

¹⁹ Itco, Kugagalai te sara sibau, kineneiget amutu'tuan, ta pei pa nuagai kam? Bulatnia, Kugagalai te enungan ka kudduat simatangeu samba sangamberi bagat oinan ka kudduat simagarak.

²⁰ Tarimeu leleu raabeuake le geti Aku, jojot leleu samba uma unta, kalulut Akugalaian ipukitcit oinan ka kudduat simatangeu samba bagat oinan ka kudduat simagarak, bule Kukau lo'ra sapaamian sipilikKu;

²¹ paamian sigalaiKu, bakkatKu, masipakakra geti puaabeuKu.”

Jot Israel tuappeake

²² Bulatnia, ta anusosogai Aku, ale Jakob, samba ta mabebesi tubum kalulut Aku, ale Israel.

²³ Ta anuabbit biribiri buluakenen rarangennu katubukKu, samba ta anuabeuake Aku ka buluakenen jajaketnu. Ta Akuake bairanennu Kutiddou buluakenen komen ele Kubesiki ekeu Kutiddou kumanyang,

²⁴ Ta anusaki kole simasingin uktukKu pasamba bulagat ele nuektekake Aku pasamba tabet buluakenen jajaketnu. Tapoi anusaneki le Aku jom, anubesiki le Aku pasamba puseleatnu.

²⁵ Aku, Aku te Nia siposa jo pukelakat patuatnu kalulut Aku le, samba ta Akurepdep jom.

²⁶ Parepdep le Aku, sita taei pakaro, kua senengamata, bule imatoila sineseat le ekeu!

²⁷ Taikebbukatnu siboiki amajongan, samba sitiboake tiboietnu mukela patuat katubukKu.

²⁸ Oto bailiuakekungan kasitsitakenen sangamberi saute ka kudduat sipunenan, samba segeakekungan si Jakob bule tumateiake samba Israel bule tupaloloi.”