Jes. 42 - BUKO SIPUNENAN

Pagugulet Tuhan

¹ Itco, nenda te pagugulet ukkaakenenKu, sirimanua sipilikKu, kilibet bagakKu. Akukauan KetsatKu katubunia, bule ipakoinong surukat ka sangamberi bangsa.

² Ta te mugegereinia ele musogania ele ipaarepake ngangania ka enungan.

³ Popoupu situulei ta te tutatakkiake, samba kape sitaimatoro ta te ipepeake, tapoi kabagat riuriu topit ipakoinong le geti surukat.

⁴ Nia leu et ta ibabailiu sitaimatoro samba ta tuulei, teret irioake surukat ka polak; sangamberi tobbou laggai masingenaake nganturatnia.

⁵ Kisene te tiboiet Taikamanua, Tuhan, sibaraake manua samba singanangakenia, siapoake polak pasamba sangamberi sipututu'tu ka uddutnia, sipasiake enga ka sirimanua silaggaijinia samba enga katubutda sia sipuririmanua ka uddutnia:

⁶ “Aku nene, Tuhan, akusogaian ekeu nugalaiake pasiaraugat, Akuukkaakean kabeinu; Akugalaian ekeu samba Kuake katubum sibailiu palelengan ka sirimanua, sibailiu pato' ka sangamberi bangsa,

⁷ masibukaake mata simapeset, masibelaake sirimanua situukum kabagat tangsi samba masibelaake sangamberi sirimanua sikuddu kabagat gepgep sibara ka tangsi.

⁸ Aku nene Tuhan, iate oningKu; Ta Kukakau pulatsananKu ka sabagei ele puaabeuKu ka tularat.

⁹ Sangamberi sipatuptup siburu kineneiget amuailingan, senengamata sibau aile Kupaagainia. Kepei bara senengamata nenda, Kupaagai le nia katubum.”

Urai pasiumun pagalaiat pasiaraugat

¹⁰ Uraiake kam urai sibau kai Tuhan samba umun kam Nia sibara ka tu'tut polak! Eddangan ipurou koat samba sangamberi sibabara kabagania samba sangamberi tobbou laggai samba leu silaggaijinia.

¹¹ Eddangan kudduat simatangeu isogaake ngangania pasamba sangamberi laggai samba laggai sigoiso kudduijietda tai Kedar! Eddangan rapugora baga sipulaggai ka Leleu Bukku, eddangan rapusoga ka uddut sangamberi leleu!

¹² Eddangan raabeuake si Tuhan, samba masipakakra katuumun katubuNia ka sangamberi tobbou laggai.

¹³ Tuhan mei pasaggak kele saladdu simagege, kele sara saladdu ironnake patuatnia pasaggak; musoga le Nia, bulatnia, mugerei, Nia masipakoinong gegenia ka sangamberi saggakNia.

¹⁴ Mumengmeng le Aku barania ka siburu peile, mutangoan le Aku, Kuomake patuatKu; Kineneiget Kuoba mukatci kele sinanalep sipususule, Kuoba musoak enga samba muenga sitete.

¹⁵ Kuoba masigalai imagarak sangamberi leleu samba tinambu, samba kumanteiake senengamata sipututu'tu; Kuoba masigalai sangamberi bagat oinan bailiu polak simagarak samba masigarakake sangamberi pao.

¹⁶ Kuoba masipaneinei sangamberi sirimanua simapeset ka enungan sitaiagaietda, samba Kuoba masiambit sia muenung ka sangamberi enungan sitaiagaietda. Kuoba masibailiuake pugepgeman kamatatda ibailiunia simapato samba polak simaguluggu ibailiunia polak simagaktuk. Nenda te galaiakenenKu katubutda, bulatnia Kugagalaiake te geti.

¹⁷ Sangamberi sirimanua simatonem baga ka tularat sipae rapitca le geti ka teitei samba rasilo puailaat, iate sangamberi sirimanua sipasikua ka tularat sigalai sirimanua: “Ekeu le taikamanuamai!”

Taimariuriu samba pesetnia Israel

¹⁸ Arepake kam, ale sangamberi sirimanua simatakkep mattai samba itco kam, ale sangamberi sirimanua simapeset!

¹⁹ Kasei pa simapeset, ke ta paguguletKu, samba simatakkep kele pakoinien sikoiniakenenKu? Kasei simapeset kele pakoinienKu samba simatakkep kele pagugulet Tuhan?

²⁰ Maigi nuitco, tapoi nulelelekake, nutongiake le talingam, tapoi ta nuarep.

²¹ Aiobaan bagaNia si Tuhan kalulut pasiaraugatnia bule iake panganturatNia siabeu samba sipunenan;

²² tapoi sia sara bangsa siraurau samba sinangkou sangamberitda tujunung kabagat ngaliu polak samba tulipputake kabagat sangamberi lalep tangsi; aibailiuan sia raurauget samba taanai sibelaake sia, ibailiu raurauget samba taanai sipasikua: “Toiliake kam!”

²³ Kasei katalagamui sioba masitongiake talinga ka pagalaiat nene, sioba masilelekake samba masiarepi pagalaiat ka gogoi sibabara?

²⁴ Kasei amasisegeake si Jakob bule ibailiu raurauget, samba Israel ka sipasiraraurau? Ta pa Tuhan le? Kalulut amajongan sita katubuNia, samba ta raoba sirimanua masitut enungan sinausauNia, samba sirimanua ta raoba masiarepi nganturatNia.

²⁵ Iageti rugutakenangan katubunia oloi goluNia samba pasaggangan sabeu, sisubuakenia ka sangalionia, tapoi ta iseseake, samba silabonia, tapoi ta ailelekake.