Jes. 41 - BUKO SIPUNENAN

Tuhan masisuruake sara sipasiarau

¹ Arepmake kam Aku kabagat mutangoan, ale sangamberi toggou laggai; bule sangamberi bangsa masisilo ron sibau! Eddangan raoi ramalegre, iageti paniborangan; kauan taei simakere pakaro!

² Kasei amasitubbuinia sibara ka kabelaiat sulu, amasitubuinia sisilo kamanangan ka senen bakkounia, sikalaake sangamberi bangsa ka matania samba masigorosotake sangamberi rimata? Lanjaunia ibailiuake sia kele abu samba siloguinia ibailiuake sia kele legei siperakat siulupakenen.

³ Kukrunangan sia samba kabagat arau ienungi enungan sitapei aiperaake rerenia.

⁴ Kasei amasigalaiake sangamberinia nenda? Nia sipasisogai barania peile siburu, ratusuru sangamberi muntogat, Aku, Tuhan, bulat siboiki samba ka sia sikateitei, Aku mariuriu le Nia leu et.

⁵ Sangamberi tobbou laggai araitcoannia samba bailiu maloto, sangamberi tu'tut polak leu bailiu mugeret tubu; moi le sia samba memei malelegre.

⁶ Sara sirimanua masiropake sirimanua sabagei samba masikua ka saleinia: “Ronake patuatnu!”

⁷ Siagai masigalai laba masironake patuat siagai masigalai mas, samba sirimanua sinimpiake logam pasamba panondoi masironake patuat sirimanua sipasipaddai ka uddut bongan; kuanangan pagalaiat pasiottot: “Maeru nenda,” lepa paronnangannia pasamba pamanta, bailiu ta ipagegeugeu.

Israel pagugulet Tuhan

⁸ Tapoi ekeu, ale Israel, paguguletKu, ale Jakob, sipilikKu, muntogat Abraham, kilibet bagakKu;

⁹ ekeu sialakKu sibara ka tu'tut polak samba sisogaiKu sibara ka sangamberi tu'tunia, Aku masikua katubum: “Ekeu paguguletKu, Akupilingan ekeu samba ta Akukeraake ekeu”;

¹⁰ bui' numaloto, kalulut Aku masipaalei ekeu, bui'numakarat baga, aipoi Aku nene Taikamanuam; Aku le geti masiroronake samba leu masiroromake ekeu; Aku le geti masiukkaake ekeu pasamba kabeiKu sikattoet sibaraake kamanangan.

¹¹ Bulatnia te, sangamberi sirimanua simagolu katubum rasilo le geti aila samba iorak paloloiat; sangamberi sirimanua sipajogloake ekeu kelean le taanai samba masubu le geti;

¹² gabanungan geti sangamberi sirimanua sipalabaakenennu, tapoi ta nusesese sia; sangamberi sirimanua sisaggangi ekeu kelean le taanai samba sappru.

¹³ Aipoi Aku nene, Tuhan, Taikamanuam, masiukkaake kabeinu samba masikua katubum: “Bui' numaloto, Aku te masiroromake ekeu.”

¹⁴ Bui' numaloto, ale leiti Jakob, ale leiti Israel! Aku te masiroromake ekeu, kisedda te tiboiet Tuhan, samba sitebui akeu iate Sipulubeunan, Taikamanuan Israel.

¹⁵ Bulatnia te, Kubailiuake le ekeu lappri pasikuiluk simalauru samba sibau, sibara son, ra'ra rua; nukuiluk le geti sangamberi leleu samba pakatainungannia, sangamberi tinambu leu bailiuakenungannia kele pokkai.

¹⁶ Satsatnungan geti sia, lepa boroiakenangan geti sia rusa, samba rusa talabari masisaragaiake sia. Tapoi ekeu nene mugora baga le geti kabagat Tuhan samba muangka baga kabagat Sipulubeunan, Takamanuan Israel.

¹⁷ Sangamberi sirimanua sipangongorik samba simageba airaragaba oinan, tapoi taanai, jalaira magarak kalulut oggou; tapoi Aku, Tuhan, masialegi geti sia, samba sibailiu Taikamanuanda tai Israel ta Kukakaddiuake sia.

¹⁸ Kugalai le geti sangamberi bagat oinan mukitcit kapata ka sangamberi tinambu simatulai, samba masigalai sangamberi bubuakat oinan mubuggra katalagat simagaktuk. Kubailiuake geti kudduat simatangeu bailiu pao samba masibuggraake oinan sibara ka polak simagarak.

¹⁹ Kuurep le geti loina pinilok ka kudduat simatangeu, loina penaga, loina murad samba loina tula; Kutu'tuake le geti loina sanobar ka bakkat loina samba loina berangan samba leu loina pinilok ka bebenia,

²⁰ bule sangamberi sirimanua masiitco samnba masiagai, masilelekake samba masiagai kolou, kabei Tuhan le amasigalai sangamberinia nene samba Sipulubeunan, Taikamanuan Israel le amasibaraake.

Tuhan masiukkat sabulungan

²¹ Kua pakarom, ngangan Tuhan, poiliat sangamberi paluluat, ngangan Rimata, Taikamanuan Jakob.

²² Eddangan raoi samba rapaagai katubumai aponia sipuaaili geti! Sipatuptup siboiki, paagai aponia katukolobatnia, bule kulelekake kainia, ele aponia pa bagei siooi geti, paagai katubumai, bule kuagai kai kalepakatnia!

²³ Paagai pagalaiat siooi geti, bule kuagai kainia, ekeu nene bulat taikamanua; galaiakean, kenanen ka enungan simaeru ele sikatai, bule imakisei kabagamai simakere iitconia!

²⁴ Bulatnia te, kam nene iate kele taanai samba sangamberi sigalaimui iate siboboi; sirimanua sipili kam iate kasitsitakenen.

²⁵ Akutubbuian sara sirimanua sibara ka bare samba amoiannia, ka isit ibela sulu Akusogaiannia ka oninia. Kele siagai mugalai pario' ipaperaki polak leleu, kisedda te nia ipaperaki sipuute kele loppak.

²⁶ Kasei aipaagaiakenia barania ka panandaatnia, bailiu agaimaiannia, samba barania siburu, bailiu kuamaiannia: “Nia te nenda?” Bulatnia, taanai sirimanua sipaagainia, taanai sirimanua sipakakrania, taanai sirimanua sipasiarep tiboiet beri goiso sibara kekeu.

²⁷ Sibailiu siboiki Aku masipaagai katubut Sion, samba Aku masikau sirimanua sipasiabbit katuareman simaeru katubut Jerusalem.

²⁸ Ke bai Kuitco sangalionia, taanai berisara sirimanua, samba katalagat sangamberi sirimanua nene taanai sioi masiake enungan, ele sioi masiake alegiat ke Kuparereake sia.

²⁹ Bulatnia te, sangamberitda kele taanai, sangamberi sigalaira siboboi le, sangamberi tularat sigalai kabei sirimanua iate kele rusa samba siboboi le.