Jes. 40 - BUKO SIPUNENAN

TIPPU 40–66 RUBEIAT SIKARUA TIPPU 40–48 PUARAUGAT KA BANGSA KABAGAT KATURIBBAIAT Katuareman kabelaiat

¹ Pusuibi kam, pusuibi kam paamianKu, kise te tiboiet Taikamanuamui,

² pusum le' patuat Jerusalem samba sogaake katubunia, atukapplungan pupagugulenannia, atuappeakean puseleatnia, kalulut aisiloan ukuman sibara kai Tuhan ruangaminca rua kalulut sangamberi jonia.

³ Ai nganga sipusosoga: “Patareka kam enungan Tuhan ka kudduat simatangeu, paroipo kam enungan ka simagarak enungan sabeu ka Taikamanuanta!

⁴ Senen guluggu buita tutabbui, samba senen leleu samba tinambu tugaktukake; polak simatinambu buita ibailiu polak simagaktuk, samba polak simabuklu ibailiu simagaktuk;

⁵ iageti pulatsanan Tuhan tupatoila samba itcorangan getinia simakere sangamberi sirimanua; bulatnia te, Tuhan le amasikua.”

⁶ Ai nganga sipasikua: “Pusoga kam!” Alegikungannia: “Aponia bulat sogaakenenku?” “Sangamberi sirimanua iate kele turuturu samba sangamberi pulaingeannia kele ogo ka polak simalio.

⁷ Turuturu bailiu magarak, ogo ibailiu malaju, ke iulupake engaNia si Tuhan. Bulatnia te bangsa nenda kele turuturu.

⁸ Turuturu bailiu magarak, ogo ibailiu malaju, tapoi tiboiet Taikamanuanta mariuriu le teret buruburu.”

⁹ Ale Sion, sipasiabbit katuareman simeru, sakaiake ekeu ka leleu simabuak! Ale Jerusalem, sipasiabbit katuareman simeru, sogaake ngangam simaron, sogaake ngangam, bui' numaloto! Kua ka sangamberi laggai Jehuda: “Itco, nenda Taikamanuamui!”

¹⁰ Itco, nenda Tuhan Taikamanua, Moi Nia kabagat puroron samba kalulut kabeiNia ipurimata. Itco, sia sibailiu silit besit tubuNia ai sia pasambaNia, samba sia sinesiaNia muenung kamataNia.

¹¹ Kele sara sipasijago tarimeu ipasijago mungkuat tarimeuNia samba iruruakenia pasamba kabeiNia; sangamberi togat biribiri ikupkupake, sangamberi inan biribiri palulunangannia simakolou.

Taikamanua ka uddut sangamberi taikamanua

¹² Kasei masiseilu koat pasamba takepnia samba masikireki manua pasamba reremang, masisukkai abut polak pasamba tekong, masikilo sangamberi leleu pasamba kilo sigoiso ele sangamberi tinambu pasamba kilo sipuuddet.

¹³ Kasei momoi masiperu Ketsat Tuhan ele masikau enungan katubuNia sibailiu sipangantru?

¹⁴ Kasei katubu ipasitiddou panganturat si Tuhan bule isese puaagai, samba kasei masigegelaiake si Tuhan bule ienungake puroipoat, ele kasei masigelaiakeNia puagaiat samba masikau katubuNia enungan bule ipugalai kabagat puaagai?

¹⁵ Bulatnia te, sangamberi bangsa iate kele sangabaibai oinan kabagat seseilu samba tuaddeake kele sangaluiku abu ka pasikilo. Bulatnia te, sangamberi tobbou ta abelenia ka abu simaailit sanenia.

¹⁶ Loina ka Libanon ta iaili tubailiuake loina paneu samba tarimeu ta iali ibailiunia buluakenen sirarak.

¹⁷ Sangamberi bangsa kele taanai kamataNia iaddeake le sia taanai katukoloubatnia samba siboboi le.

¹⁸ Oto, pasamba kasei nupakereake kam Taikamanua, samba aponia addeakenennu simakere kele Nia?

¹⁹ Tularat pa? Siagai mugalai laba masiuruakenia, samba siagai mugalai mas ilakkekinia pasamba mas, igalai palenggui perak addeatnia.

²⁰ Sirimanua sirioake tularat, masipili loina sitaimaruei mamu'mu, masigaba siagai kabei mugalai bule irioake tularat sitaimaruei ipaguilak.

²¹ Ta pa nuagai kam? Ta pa anuarep kam? Ta pa atupaagai katubumui ka panandaatnia? Ta pa nuagai kam kolou barania peile kateteret aitugalakake bongan polak?

²² Nia sipuririmata ka uddut muinet polak sikudduijinia kele sit; Nia sipasinganangake manua kele komak samba igalainia kele sapou pukudduanan!

²³ Nia masigalai siabeu tiboi tubu ibailiu taanai samba sibailiuake sipasiukum ka polak bailiu siboboi!

²⁴ Simaruei le aituurepake sia, simaruei le aitukarapake sia, simaruei le arapuungat ka polak, ulupnangan sia, bailiu magarakrangan samba burutakenangan sia rusa talabari kele siperakat.

²⁵ Pasamba kasei nupakekereake Aku, nuaddeake Aku kele nia? Tiboiet Sipunenan.

²⁶ Ipoake matam ka manua samba itco pei: kasei amasibaraake sangamberi panyanyat nenda samba amasikoiniake rabela sangamberi saladdutda, sialei masisogai sangamberi oninda? Berisara sia sitaiooi, kalulut Nia sipulugege samba simakope ron.

²⁷ Angoi nukua kisedda, ale Jakob, samba nukua kisene, ale Israel: “Purimanuaiatku malipput kai Tuhan, samba ikepakenenku ta ipuletsei Taikamanuangku?”

²⁸ Ta pa nuagai, samba ta pa anuarep? Tuhan iate Taikamanua simatom sibaraake polak barania ka tu'tu pat aili ka tu'tu; ta' masasaggo samba ta' masulei tubuNia, tamomoi tusinougi puaagaiNia.

²⁹ Nia masikau ron ka simasaggo tubu samba masituppai ron patuat ka sitaioi tubu.

³⁰ Sangamberi sibau tubu ibailiu masaggo samba masulei tubu samba tailainge bele tusoksok,

³¹ tapoi sirimanua singenaake si Tuhan bara ron tubu sibau: sia tupakereake kele manyang situburut kapata kabagat ron kapponia; pabalaurangan samba ta masusulei tubutda, puenungrangan samba ta massasaggo sia.