Jes. 4 - BUKO SIPUNENAN

¹ Kateteret nenda pitu tainanalep raukkaake te sara simanteu, samba masikua, “Aile kugaba kai kanmai samba leppeimai; sarat kau le ibailu ekeu simanteumai; belaakean kai kabagat puailaa!”

Jerusalem tupuneni samba tujago

² Kateteret nenda sinula situ'tuakenen Tuhan ibailiu le geti pulaingean samba pulatsanan, samba buat mone leu ibailiu le geti katuumunan samba puaabeu ka tai Israel situaarau.

³ Senen sirimanua sikukuddu ka Sion samba sipulelegei ka Jerusalem tuoniake le sipunenan, iate senen sirimanua ka Jerusalem sitususurat bule rasilo purimanuaiat,

⁴ ke aipalinaan si Tuhan pulolinan siokko Sion samba masiposa sangamberi jo pamamatei katalagat Jerusalem, kabagat ketsat sipasiukum samba sipasilabo.

⁵ Iageti ka uddut leleu Sion samba sangamberi sirimanua siparururu sedda, Tuhan masibaraake tanai rusa kateteret sinago, kujuk samba leu toro simapato kateteret sinoibo. Taikamanua, kabagat gegeNia ikunemi samba ijago sangaliot laggai nenda.

⁶ Ikunemi le sia geti ka oloi sulu kateteret sinago samba ibailiunia kudduat pukuneman ka urat simatirit samba rusa talabari.